रौतहट,१२ जेठ । मेडिकल व्यवसायी तथा ‘राष्ट्र, राष्ट्रियता, धर्म–संस्कृति र नागरिक बचाउ महाअभियान’ का संयोजक दुर्गा प्रसाईँ मंगलबार पर्सा जिल्ला अदालतको आदेशपछि हिरासतमुक्त हुनु भएको छ। अदालतमा भएको थुनछेक बहसपछि न्यायाधीश गायत्रीप्रसाद रेग्मीको एकल इजलासले प्रसाईँलाई साधारण तारेखमा छाडेर मुद्दाको पूर्पक्ष गर्न दिने आदेश जारी गरेको हो । अदालतको यो निर्णयसँगै उनले अब जेलबाहिरै रहेर कानुनी लडाइँ लड्न पाउने हुनु भएको छ।
पर्सा जिल्ला अदालतका न्यायाधीश रेग्मीको इजलासले प्रसाईँलाई थुनामा राखिरहनु नपर्ने ठहर गरेको हो । अदालत स्रोतका अनुसार, मुद्दाको अन्तिम किनारा नलागेसम्म उहाँलाई तारेखमा राख्दै कानुनी प्रक्रिया अगाडि बढाउन आदेश दिइएको छ ।जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक (डिएसपी) हरिबहादुर बस्नेतले अदालतको औपचारिक आदेश प्राप्त भएपछि प्रसाईँलाई साधारण तारेखमा रिहा गरिएको पुष्टि गर्नु भयो । मंगलबार अदालतमा सरकारी वकिल र प्रसाईँका कानुन व्यवसायीहरूबीच निकै बेर थुनछेक बहस भएको थियो । दुवै पक्षको बहस सुनेपछि अदालतले प्रसाईँलाई न्यायिक हिरासतमा राखिरहन आवश्यक नरहेको निष्कर्ष निकालेको हो ।
प्रहरीले दुर्गा प्रसाईँलाई गत मंगलबार वीरगन्जबाट पक्राउ गरेको थियो । उहाँविरुद्ध दुईवटा गम्भीर मुद्दा दर्ता गरिएको थियो ।
सामाजिक सञ्जाल तथा सञ्चारमाध्यममार्फत भ्रम फैलाएको र साइबर अपराध गरेको आरोपमा विद्युतीय (इलेक्ट्रोनिक) कारोबार ऐन अन्तर्गतको कसूर र राज्यको शान्ति सुरक्षा र प्रणालीलाई खलल पुर्याउने खालका गतिविधि तथा अभिव्यक्ति दिएको आरोपमा राज्यविरुद्धको कसूर का मुद्दा दर्ता गरिएका थिए ।
यिनै मुद्दाहरूमा अनुसन्धान गर्न प्रहरीले उहाँलाई हिरासतमा राखेर कानुनी कारबाही अगाडि बढाएको थियो । पछिल्लो समय मेडिकल व्यवसाय भन्दा बढी आफ्नो राजनीतिक तथा सामाजिक अभियानका कारण प्रसाईँ चर्चामा हुनुन्छ ।
