काठमाडौं,१३ जेठ । सरकारले विना विकल्प सुकुम्बासी तथा अव्यवस्थित बसोबासीका बस्तीमा डोजर चलाएको भन्दै सरोकारवालाहरुले विरोध जनाउनु भएको छ। उहाँरुले सरकारको नेतृत्व गरेको पार्टीका सभापति रवि लामिछानेले चुनावको बेला बोलेको कुरालाई स्मरण गर्दै ‘रबिको छाती कहाँ गयो रु’ भन्ने प्रश्न समेत गर्नु भएको छ ।
सुकुम्बासी समस्या कानुन निर्माण भएर पुर्जा वितरणको अन्तिम चरणमा पुगेको तर सरकारले अमानवीय ढंगबाट डोजर चलाएको उहाँहरुले दाबी गर्नुभयो ।
बुधबार संवाद डबलीमा नेपाल भूमिहिन सुकुम्बासी तथा अव्यवस्थित बसोबासी संरक्षण समितिले आयोजना गरेको कार्यक्रममा बोल्दै बक्ताहरुले सो कुरा बताउनु भयो ।
कार्यक्रममा नेकपा एमालेकी सचिव तथा सांसद पद्मा अर्यालले सरकार गरिब तथा सुकुम्बासीको अभिभावक बन्नुपर्नेमा राज्य आतंक सिर्जना गरेको बताउनु भयो ।
उहाँले आफू मन्त्री भएको बेला सुकुम्बासीलाई पुर्जा वितरणको लागि आवश्यक पर्ने सबै कानुन बनाएको स्मरण गर्दै भन्नु भयो ‘म मन्त्री हुँदा सुकुम्बासीलाई पुर्जा वितरणको लागि आवश्यक पर्ने सबै कानुन बनाएर आयोग र पालिकासँग सहकार्य गरेर पुर्जा वितरणको अन्तिम तयारमा थियौं । हामीले १२ लाख सुकुम्बासीको पहिचान समेत गरिसकेका थियौं । हामी पुर्जा वितरणको तयारमा थियौं तर दुईतिहाईको सरकारले डोजर चलायो ।’
उहाँले पहिचान भइसकेकालाई पुर्जा वितरण गरेर अगाडि बढ्न वर्तमान सरकारलाई अबसर भएको तर सरकारले राज्य आतंक सिर्जना गरेको दाबी समेत गर्नुभयो ।
अधिवक्ता एकराज भण्डारीले नागरिकलाई संविधानले बसोबासको अधिकार सुनिश्चित गरेको बताउँदै विना विकल्प डोजर चलाउन कानुनीरुपमा र मानवीयरुपमा सही नभएको बताउनु भएको छ ।
नेकपा माओवादीकी नेतृ सावित्रा दुराले सरकार वास्तविक सुकुम्बासीको समस्यामा गम्भीर नभएको बताइन् । उनले नागरिकले देशमा बस्न पाउनुपर्ने नैसर्गिक अधिकार भएको तर यो सरकारले त्यो हनन् गरेको बताउनु भयो । उहाँले आफ्नो पार्टीले सुकुम्बासीको साथमा रहेको बताउँदै अधिकारको लागि गरिने आन्दोलनमा एक्येवद्धता समेत जाहेर गर्नुभयो ।
पूर्वभूमि आयोगका उपाध्यक्ष नहिन्द्र खड्काले सरकारले सुकुम्बासीलाई समस्या समाधान भन्दापनि स्टन्ट गर्न डोजर चलाएको बताउनु भयो । उहाँले आफूहरुले आयोगमा हुँदा कानुन निर्माण र वास्तविक सुकुम्बासीको पहिचान गरि पुर्जा वितरण सुरु गरेको तर अहिले रोकिएको बताउनु भयो ।
क्रान्तिकारी कम्युनिस्ट पार्टीका युवा नेता नविन खड्का, श्रम संस्कृति पार्टीका नेता जितजंग तामाङ, अभियान्ता बलबहादुर नेपालीले समेत वर्तमान सरकार सुकुम्बासीप्रति संवेदनशील नभएको दाबी गरेका थियो । उहाँहरुले उठिबास लगाएर होल्डिङ सेन्टरमा सुकुम्बासीलाई सरकारले अमानवीयरुपमा राखेको दाबी गर्दै आफ्नो अधिकारको लागि देशभरका सुकुम्बासीले एकजुट हुनुपर्नेमा जोड दिएका थिए ।
कार्यपत्र प्रस्तुत गर्दै विरेन्द्र बिकले नेपालमा भुमिहिन दलित,सुकुम्बासी तथा अव्यवस्थित बसोबासको समस्या दशकौँदेखि विद्यमान सामाजिक, आर्थिक तथा राजनीतिक समस्या भएको बताउनु भयो ।
उहाँले नेपालको संविधान २०७२ ले आवास, सामाजिक न्याय तथा सम्मानपूर्वक बाँच्न पाउने अधिकार सुनिश्चित गरेको बताउँदै त्यसलाई चुनौती दिने गरी रास्वपाका वरिष्ठ नेता बालेन्द्र शाह नेतृत्वको सरकारको निर्देशनमा काठमाडौं, कोहलपुर, बुटवल मोरङ्गसहित ठाउँमा सुरक्षाकर्मी परिचालन गरेर बलपूर्वक डोजर आतंक मच्चाएको बताउनु भयो । उहाँले होल्डिङ सेन्टरमा महिला, बालबालिका,बृद्ध बृद्धालाई बिचल्ली पारेको भन्दै कानुनी, मानवीय तथा दिर्घकालिन समस्या समाधान आवश्यक रहेको बताउनु भयो।
