दमक,१४ जेठ । भोली, जेठ १५ गते! सारा देशको नजर संघीय संसदमा हुनेछ। अर्थतन्त्रका जानकार मानिने अर्थमन्त्री डा. स्वर्णीम वाग्लेले आगामी आर्थिक वर्षको बजेट प्रस्तुत गर्दै हुनुहुन्छ। तर प्रश्न यो हो— के यो बजेटले आम नागरिकको भान्सादेखि निर्माण व्यवसायीको कार्यस्थलसम्म फैलिएको ’महँगीको आगो’ निभाउन सक्ला?
अवस्था कति भयावह छ भने, हिजो ठेक्का लिन मरिहत्ते गर्ने व्यवसायीहरू आज बोलपत्र हाल्न समेत डराइरहेका छन्। बिराटनगर महानगरपालिकाको ४६ ठेक्कामा १४ वटामा त एउटा पनि निवेदन परेन। किन? किनकि निर्माण सामग्रीको मूल्य यति बढेको छ कि सरकारी ’स्टिमेट’ मा काम गर्नु भनेको आफैँ डुब्नु हो।
अर्थमन्त्री ज्यू, तपाईं अर्थतन्त्रको विज्ञ हुनुहुन्छ। तपाईंबाट देशले ’परम्परागत भाषण’ होइन, ’क्रांतिकारी सुधार’को अपेक्षा गरेको छ। के यो बजेटले निर्माण सामग्रीको अनियन्त्रित मूल्य वृद्धिलाई सम्बोधन गर्नेछ? के पुरानो ढर्राको ’रेट रिभ्यु’ लाई खारेज गर्दै नयाँ बजार भाउ अनुसारको ’प्राइस एड्जस्टमेन्ट’ को ठोस संयन्त्र ल्याउन सक्नुहुन्छ?
यदि भोलिको बजेटले पनि महँगी नियन्त्रणको बलियो आधार तयार गर्न सकेन भने, सम्झनुहोस्— तपाइँले ल्याउने खर्बौंको बजेट कागजको खोस्टो सावित हुनेछ। विकासका योजनाहरू अलपत्र पर्नेछन् र देशको पूर्वाधार निर्माण ठप्प हुनेछ।
डा. वाग्ले, अब ’एक्सपर्ट’ को परिचय मात्र काफी छैन। जनताले तपाइँको बजेटमा महँगीविरुद्धको प्रहार खोजेका छन्। के तपाईं महँगीको यो चपेटाबाट देशलाई मुक्त गर्न सक्नुहुन्छ? कि फेरि पनि विकासको सपना महँगीको नाममा बन्धक रहनेछ?
भोलि अपरान्ह ४ बजे, इतिहासले तपाईंको यो बजेटको लेखाजोखा गर्नेछ!
