दमक, १७ जेठ | झापाको दमकमा बोराभित्र बाँधिएको अवस्थामा मृत फेला परेकी महिलाको पहिचान खुलेको छ।
जिल्ला प्रहरी कार्यालय झापाका अनुसार मृतक दमक नगरपालिका वडा नम्बर ८, बसन्तटोल निवासी नारायण तिवारीकी २१ वर्षीया छोरी रोमा भन्ने रमा तिवारी रहेको पुष्टि भएको हो।
मृतकका बुवा नारायण तिवारी र आमा मुना तिवारीले शव हेरेर आज सनाखत गरेपछि पहिचान खुलेको प्रहरीले जनाएको छ।
प्रहरीका अनुसार रमा तिवारी गत जेठ १३ गते राति करिब साढे ९ बजे घरबाट आफैँ निस्किएकी थिइन्। त्यसपछि उनी घर नफर्किएको बुझिएको छ।
यसअघि शनिबार बिहान दमक नगरपालिका वडा नम्बर १० सेतुमारीस्थित रतुवा खोलाको पुलमुनि बगिरहेको पानीमा शङ्कास्पद अवस्थामा एक महिलाको शव फेला परेको थियो। स्थानीयबासीले शव देखेपछि प्रहरीलाई खबर गरेका थिए।
