दमक, २४ जेष्ठ । राष्ट्रिय स्वतन्त्र पार्टी (रास्वपा) को प्रथम जिल्ला अधिवेशनले झापामा नयाँ नेतृत्व चयन गर्दै पाँचवटै निर्वाचन क्षेत्रको संगठनात्मक संरचना निर्वाचनमार्फत टुंग्याएको छ। यसैक्रममा झापा निर्वाचन क्षेत्र नम्बर–५ मा चुडामणि पाठक (विवेक) सभापतिमा निर्वाचित हुनुभएको छ।
शनिबार बिर्तामोडमा सम्पन्न अधिवेशनमा निकै प्रतिस्पर्धात्मक मतदानपछि पाठकले विजय हासिल गर्नुभएको हो। यसअघि ‘बालेन कमाण्डर’ का रूपमा चर्चित रहनुभएका भेषराज भट्टराईलाई झिनो मतान्तरले पराजित गर्दै पाठक नेतृत्वमा पुग्न सफल हुनुभएको हो।
निर्वाचन परिणामअनुसार पाठकले ५३ मत प्राप्त गर्नुभयो भने भट्टराईले ५१ मत प्राप्त गर्नुभयो। सभापति पदका अर्का उम्मेदवार धिरज न्यौपानेले २९ मत प्राप्त गर्नुभएको थियो। कडा प्रतिस्पर्धाबीच भएको मतदानले झापा–५ मा रास्वपाभित्र नेतृत्वका लागि बलियो राजनीतिक सक्रियता देखिएको विश्लेषण गरिएको छ।
त्यस्तै, झापा–५ को उपसभापतिमा चिरन न्यौपाने सर्वसम्मत चयन हुनुभएको छ। उक्त पदमा उहाँविरुद्ध कसैको उम्मेदवारी नपरेपछि न्यौपाने निर्विरोध निर्वाचित हुनुभएको हो।
नवनिर्वाचित सभापति पाठक र उपसभापति न्यौपानेले अब अन्य पदाधिकारी तथा सदस्य मनोनयन गरी क्षेत्रीय समितिलाई पूर्णता दिने जिम्मेवारी पाउनेछन्।
विशेष कुरा के छ भने, झापा–५ को नेतृत्वमा पुगेका दुवै युवा दमकका सफल व्यवसायीका रूपमा परिचित छन्। सभापति पाठक लामो समयदेखि देश तथा विदेशसम्म सामान ढुवानी र वितरण गर्ने कुरियर तथा ट्रान्सपोर्ट व्यवसायमा संलग्न हुनुहुन्छ।
यस्तै उपसभापति न्यौपाने जापान अध्ययन वा रोजगारीका लागि जान चाहने युवालाई भाषा प्रशिक्षण, परामर्श तथा आवश्यक डकुमेन्ट व्यवस्थापन सेवा प्रदान गर्ने कन्सल्टेन्सी व्यवसाय सञ्चालन गर्दै आउनुभएको छ।
व्यवसायिक पृष्ठभूमिबाट आएका दुई युवाको नेतृत्वमा रास्वपा झापा–५ ले आगामी दिनमा संगठन विस्तार र राजनीतिक गतिविधिलाई कसरी अघि बढाउँछ भन्ने विषय अहिले चासोका साथ हेरिएको छ।
यो निर्वाचन क्षेत्र प्रधानमन्त्री बालेन शाहको निर्वाचन क्षेत्र रहेकोले समेत खास नजर र दृष्टिकोणले देशभरबाटै हेर्ने गरीएको छ ।
