मनीला (एजेन्सी) जेठ २५ फिलिपिन्सको दक्षिणी क्षेत्र मिन्डानाओमा सोमबार बिहान गएको ७.८ रेक्टर स्केलको शक्तिशाली भूकम्पका कारण कम्तीमा १५ जनाको मृत्यु भएको छ भने १२९ भन्दा बढी घाइते भएका छन्। घाइतेमध्ये धेरैको अवस्था चिन्ताजनक रहेकाले मृतकको सङ्ख्या अझै बढ्न सक्ने आशङ्का गरिएको छ।
भूकम्पका कारण दक्षिण कोटाबातो, सुल्तान कुदारत, साराङ्गानी र जनरल सान्तोस सिटीसहितको सोक्सस्कार्गेन क्षेत्र सबैभन्दा बढी प्रभावित भएको छ।
भूकम्पको केन्द्रविन्दु समुन्द्रनजिकै रहेका कारण फिलिपिन्सका नौवटा प्रान्तका तटीय क्षेत्रहरूमा तीन मिटरसम्मको सुनामी आउन सक्ने चेतावनी दिइएको छ। सुनामीको खतरालाई मध्यनजर गर्दै तटीय क्षेत्रका बासिन्दाहरूलाई तत्काल सुरक्षित र उच्च स्थानतर्फ सर्न निर्देशन दिइएको छ। यसको असर छिमेकी देशहरूमा समेत पर्न सक्ने भन्दै इन्डोनेसिया र जापानले पनि आ–आफ्ना तटीय क्षेत्रमा सुनामीको उच्च सतर्कता (अलर्ट) जारी गरेका छन्।
फिलिपिन्सका राष्ट्रपति फर्डिनान्ड मार्कोसले राज्यका सबै संयन्त्रलाई उद्धारमा होमिन निर्देशन दिनुभएको छ। समाज कल्याण तथा विकास विभाग (DSWD) ले प्रभावित क्षेत्रका ११ लाखभन्दा बढी नागरिकका लागि आपतकालीन खाद्यान्न सामग्री वितरण सुरु गरिसकेको छ भने देशभर ४७ लाख फूड प्याक तयारी अवस्थामा राखिएको जनाएको छ।
सुरक्षा निकायहरूले सम्भावित परकम्पहरूको जोखिमलाई ध्यानमा राख्दै निरन्तर निगरानी गरिरहेका छन् भने प्रभावित क्षेत्रमा खोजी तथा उद्धार कार्य तीव्र पारिएको छ।
