काठमाडौं,२८ जेठ । नेकपा एमालेकी सांसद निता घतानीले जातीय विभेदका कारण दिपा नेपाली ५४ दिनदेखि सडकमा सत्याग्रहमा बस्न बाध्य भएको भन्दै सरकारको ध्यानाकर्षण गराउनु भयो ।
बिहीबार बसेको प्रतिनिधिसभा बैठकमा बोल्दै उहाँले जातीय विभेदका कारण पीडित बनेका नागरिकले न्याय नपाएको र राज्य मौन दर्शक बनेको आरोप लगाउनु भयो।
सांसद घतानीले सत्याग्रहमा बसिरहेकी दिपा नेपालीलाई तत्काल वार्तामा बोलाएर उनका माग सम्बोधन गर्न सरकारसँग माग गर्नु भयो । उहाँले जातीय विभेदविरुद्धका कानुनहरू कडाइका साथ कार्यान्वयन हुनुपर्नेमा जोड दिँदै कागजमा मात्र अधिकार सीमित हुनु राज्यको कमजोरी भएको बताउनु भयो।
उहाँका अनुसार, नागरिक सडकमा सत्याग्रह गर्न बाध्य हुनु र सांसदहरूले बारम्बार सदनमा आवाज उठाउनुपर्ने अवस्था सुशासनको असफलता हो ।
उहाँले भन्नु भयो,‘सम्माननीय प्रधानमन्त्रीले नेपालले भारतको सीमा मिचेको देख्नुभयो । तर आफ्नै देशमा नागरिकहरू जातीय विभेदका कारण कोठा नपाएर ५४ दिनदेखि सडकमा सत्याग्रह गरेर बसेको पीडा देख्न सक्नुभएको छैन । सरकारसँग माग गर्छु, अब मौन दर्शक बनेर नबसोस् । सत्याग्रह धर्नामा बसेकी दिपा नेपालीलाई तत्काल वार्तामा बोलाइयोस्, उहाँका माग सम्बोधन होस् र जातीय विभेदविरुद्धको कानुन कडाइका साथ लागू गरियोस्। म चाहन्छु अब यो विषय लिएर सदनमा फेरि उभिन नपरोस् । किनकि नागरिक सडकमा सत्याग्रह गर्ने र सांसद सदनमा बारम्बार आवाज उठाउन बाध्य हुने कुनै सफल शासनको परिचय होइन, यो राज्यको गम्भीर असफलताको परिचय हो । कानुन बनेका छन् तर कागजमा अधिकार र व्यवहारमा विभेद कायम रहनु राज्यको कमजोरी हो ।’
