झापामा ८ असार । झापामा लागुऔषध सेवन र कारोबारमा संलग्न व्यक्तिको संख्या २० हजारभन्दा बढी पुगेको अनुमान गरिएको छ। जिल्ला प्रहरी कार्यालय झापाकी प्रमुख प्रहरी उपरीक्षक वसुन्धरा खड्काका अनुसार हाल लागुऔषधसम्बन्धी मुद्दामा ९२४ जना कारागार र प्रहरी हिरासतमा छन्।
प्रहरी तथ्याङ्कअनुसार जिल्ला कारागारमा ३७६ जना, पुर्पक्षका लागि थुनामा ३४० जना र हिरासतमा २०८ जना लागुऔषधको बेचबिखन तथा ओसारपसारसम्बन्धी कसुरमा छन्। जिल्लाका ४२ सुधार केन्द्रमा एक हजार २६२ जना उपचाररत छन् भने प्रादेशिक अस्पताल भद्रपुरमा १३३ जनाले नियमित उपचार गरिरहेका छन्।
पछिल्ला वर्षहरूमा लागुऔषधसम्बन्धी घटनामा निरन्तर वृद्धि देखिएको छ। चालु आर्थिक वर्षको जेठसम्म मात्रै ३५२ जना पक्राउ परिसकेका छन्। सीमावर्ती मेचीनगर लागुऔषध ओसारपसारको मुख्य केन्द्र बनेको प्रहरीको भनाइ छ।
प्रहरीले विद्यालयस्तरीय सचेतना, शिक्षक तालिम, खेलकुद कार्यक्रम तथा समुदायस्तरीय नियन्त्रण क्लब गठनमार्फत लागुऔषध नियन्त्रण अभियान सञ्चालन गरिरहेको जनाएको छ।
