निर्मला पन्तको फाएल खुल्दै , बल्दै फेरि एकपटक आशाको दियो

कञ्चनपुर,१८ असार । कञ्चनपुरकी १३ वर्षीया बालिका निर्मला पन्तको बलात्कार र हत्या भएको झन्डै ८ वर्ष पुग्न लाग्दा पनि न्याय मिल्न सकेको छैन। यही पृष्ठभूमिमा नेपाल प्रहरीले यो संवेदनशील प्रकरणको अनुसन्धानलाई फेरि ब्युँताउँदै एउटा नयाँ, उच्चस्तरीय समिति गठन गरेको छ।
गृहमन्त्री सुधन गुरुङले संसद्मा पुराना र संवेदनशील मुद्दाहरूलाई उच्च प्राथमिकतामा राखेर ’फाइल री–ओपन’ गर्ने प्रतिबद्धता जनाएलगत्तै प्रहरी प्रधान कार्यालयले यो ठोस कदम चालेको हो।
नयाँ समितिको संरचना र जिम्मेवारी
प्रहरी महानिरीक्षक दानबहादुर कार्कीको निर्देशनमा गठित यो टोलीको नेतृत्व अपराध अनुसन्धान विभागका प्रहरी वरिष्ठ उपरीक्षक कृष्णप्रसाद पंगेनीले गरिरहेका छन्। नयाँ शिराबाट सुक्ष्म र प्रमाण–आधारित छानबिनका लागि यो टोली कञ्चनपुर पुगिसकेको छ।
टोलीका मुख्य सदस्यहरू
प्रहरी नायब उपरीक्षक हरि खतिवडा (आईजीपी सचिवालय)

प्रहरी निरीक्षक (केन्द्रीय अनुसन्धान ब्युरो
प्राविधिक तथा डिजिटल फरेन्सिक विज्ञ टोली

विगतका कमजोरी सुधार्ने प्रयास
वि.सं. २०७५ साउन १० गते कञ्चनपुरको भीमदत्त नगरपालिका–२, उल्टाखामकी निर्मला पन्तको बलात्कारपछि हत्या गरिएको अवस्थामा उखुबारीमा शव फेला परेको थियो। तत्कालीन समयमा सुरुवाती अनुसन्धानका क्रममा प्रहरीबाट गम्भीर लापरवाही भएको र घटनास्थलको प्रमाण नष्ट गरिएको भन्दै देशव्यापी रूपमा तीव्र आक्रोश र विरोध प्रदर्शन भएको थियो।

प्रहरी प्रवक्ताका अनुसार यसअघि दर्जनभन्दा बढी छानबिन समितिहरू बने पनि तिनले कुनै निष्कर्ष निकाल्न सकेनन्। अहिलेसम्म १२३ जनाभन्दा बढी शङ्कास्पद व्यक्तिहरूको डीएनए परीक्षण गरिए पनि कसैसँग म्याच हुन सकेको छैन।

अनुसन्धानको नयाँ मोडः अबको छानबिन केवल डीएनएमा मात्र सीमित हुने छैन। टोलीले अन्य वैज्ञानिक, प्राविधिक र वैकल्पिक भौतिक प्रमाणहरूलाई मुख्य आधार बनाउने रणनीति लिएको छ।

लामो समयदेखि न्यायको पर्खाइमा रहेकी निर्मलाकी आमा र आम नागरिकका लागि यो नयाँ समितिले फेरि एकपटक आशा जगाएको छ। यदि यो टोलीले कुनै पनि राजनीतिक दबाबविना निष्पक्ष ढङ्गले काम गर्न पाएमा वास्तविक अपराधी कानुनी कठघरामा उभिने विश्वास गरिएको छ।