काठमाडौं,३१ असार । राष्ट्रिय प्रजातन्त्र पार्टी (राप्रपा) का सांसद ताहिर अली भाटले प्रधानमन्त्रीको अभिव्यक्ति सम्बन्धी विवादमा सभामुखले यथाशीघ्र निर्णय लिनुपर्ने माग गर्नु भएको छ। बुधबार बसेको प्रतिनिधिसभाको बैठकमा बोल्दै सांसद भाटले उक्त विषयमा लामो समयदेखि आपत्ति जनाउँदै आएको उल्लेख गर्दै अब सभामुखले आफ्नो विवेक, संसदीय नियम र मर्यादा अनुसार निर्णय लिनुपर्ने बताउनु भएको छ।
उहाँले भन्नु भयो, ‘सम्माननीय सभामुख महोदय, यो सदन हजुरको विवेकको निर्णय सुन्न चाहन्छ। हजुरको विवेकले के भन्छ? किनभने प्रधानमन्त्रीको उक्त अभिव्यक्तिप्रति हामीले महिनौँदेखि निरन्तर आपत्ति जनाउँदै आएका छौँ। यो विषयमा सदनको बहुमूल्य समय खर्च भइरहेको छ।’ भाटले यसरी अन्योलको अवस्था लामो समयसम्म कायम रहनु न संसदको गरिमा अनुकूल हुने, न संसदीय कार्यसञ्चालनकै हितमा हुने बताउनु भएको छ।
उहाँले सभामुखलाई सम्मानपूर्वक आग्रह गर्दै सकेसम्म छिटो निर्णय लिएर संसदलाई अनावश्यक गतिरोधबाट मुक्त गर्न र संसदीय कारबाहीलाई व्यवस्थित तथा प्रभावकारी रूपमा अघि बढाउन पहल गर्न अनुरोध गर्नु भएको छ।
