काठमाडौँ,२ साउन। विभिन्न अस्पतालमा कार्यरत मेडिकल अधिकृत, इन्टर्न तथा आवासीय चिकित्सकहरूले चरम श्रम शोषण भएको भन्दै काठमाडौँको माइतीघरमा विरोध प्रदर्शन गरेका छन्। ’युवा तथा प्रशिक्षार्थी चिकित्सकको श्रम शोषण विरुद्धको सङ्घर्ष समिति’ को नेतृत्वमा उनीहरू आन्दोलनमा उत्रिएका हुन्।
आन्दोलनकारी चिकित्सकहरूले नेपालको श्रम ऐन, २ हजार चौरतर बमोजिम ड्युटी समय दैनिक बढीमा १२ घण्टा र हप्तामा अधिकतम ७२ घण्टा मात्र कायम गर्न तथा हप्तामा एक दिन अनिवार्य बिदा दिन माग गरेका छन्। साथै, हप्तामा अडचालीस घण्टाभन्दा बढी काम खटाइएको खण्डमा श्रम ऐनअनुसार अतिरिक्त समय (ओभरटाइम) भत्ता उपलब्ध गराउनुपर्ने उनीहरूको अडान छ।
यसका साथै, नेपाल सरकारले बजेट भाषणमार्फत बढाएको पारिश्रमिक र विगतको सहमति अनुरूप आवासीय चिकित्सकहरूलाई अधिकृत आठौँ तह सरहको तलब तत्काल कार्यान्वयन गर्नुपर्ने उनीहरूको माग छ। एमबीबीएस र बीडीएस पूरा गरेपछि एमडी, एमएस वा एमडीएस अध्ययन गर्नका लागि अनिवार्य राखिएको एक वर्षे कार्यअनुभवको प्रावधान पूर्ण रूपमा खारेज हुनुपर्ने माग समेत उनीहरूले राखेका छन्। आफ्ना यी मागहरू सम्बोधन नभएसम्म आन्दोलनलाई निरन्तरता दिने चेतावनी चिकित्सकहरूले दिएका छन्।
