काठमाडौं, ६ साउन । सिनर्जी पावर डेभलपमेन्ट लिमिटेडले प्रवद्र्धन गरेको १० मेगावाट क्षमताको सिप्रिङ खोला जलविद्युत आयोजनाको विद्युत उत्पादन पूर्ण रुपमा बन्द भएको छ । साउन ५ गते राति ११ बजे आएको भीषण बाढी र पहिरोका कारण आयोजनाको संरचनामा क्षति पुगेपछि उत्पादन बन्द भएको हो । कम्पनीले नेपाल स्टक एक्सचेन्ज (नेप्से) लाई उपलब्ध गराएको जानकारी अनुसार, बाढी र पहिरोले आयोजनाको हेडवक्र्स (बाँध क्षेत्र) का अधिकांश संरचनाहरूमा ठुलो क्षति पुर्याएको छ । प्रारम्भिक जानकारी अनुसार आयोजनाको भौतिक संरचनामा क्षति पुगेकाले विद्युत उत्पादन तत्कालका लागि पूर्ण रूपमा रोक्नु परेको कम्पनीले जनाएको छ ।
आयोजनामा पुगेको क्षतिको विवरण सार्वजनिक गर्दै कम्पनीका प्रबन्ध सञ्चालक सुरेन्द्र बहादुर खड्काले यस विषम परिस्थितिको बारेमा नियामक निकायहरूलाई औपचारिक जानकारी गराउनु भएको छ । कम्पनीले घटनाको बारेमा नेपाल धितोपत्र बोर्ड, विद्युत नियमन आयोग, कम्पनी रजिस्ट्रारको कार्यालय र सिडिएस एण्ड क्लियरिङ लिमिटेडलाई समेत बोधार्थ पठाएको छ ।
दोखला जिल्लामा अवस्थित यस आयोजनाको क्षतिको विस्तृत विवरण र पुनः सञ्चालनका लागि लाग्ने समयबारे थप अध्ययन भइरहेको छ । प्राकृतिक विपत्तिका कारण आयोजना बन्द हुँदा कम्पनीको दैनिक उत्पादन र आम्दानीमा प्रत्यक्ष असर पुग्ने देखिएको छ ।
