काठमाडौं,२० साउन । इजरायलका प्रधानमन्त्री बेन्जामिन नेतन्याहुले हमास पूर्ण रूपमा निःशस्त्र नभएसम्म गाजाबाट आफ्नो सेना फिर्ता नगर्ने बताउनु भएको छ । उहाँले इजरायली सेनालाई आफ्नो सुरक्षा, भूभाग र नागरिकको संरक्षणका लागि आवश्यक कदम चाल्न निर्देशन दिइएको पनि बताउनु भएको छ । मंगलबार सामाजिक सञ्जालमार्फत सार्वजनिक गरिएको भिडियो सन्देशमा नेतन्याहुले इजरायल डिफेन्स फोर्स (आईडीएफ) का सैनिकहरूलाई आवश्यक सबै उपाय अपनाउन निर्देशन दिएको उल्लेख गर्नु भएको छ ।
अमेरिकी राष्ट्रपति डोनाल्ड ट्रम्पले बिहीबार गाजामा हमाससहित अन्य सशस्त्र समूहको पूर्ण निःशस्त्रीकरण गर्ने उद्देश्यसहित तथाकथित ‘बोर्ड अफ पिस’ ले तयार पारेको सम्झौता सार्वजनिक गर्नु भएको थियो । उक्त प्रस्तावबारे प्रतिक्रिया दिँदै नेतन्याहुले अमेरिकाले मस्यौदा पठाएको भए पनि इजरायलले त्यसमा सहमति नजनाएको स्पष्ट पार्नु भयो ।‘यो हाम्रो मस्यौदा होइन । हामीले आफ्ना टिप्पणीहरू पठाएका छौं,‘ नेतन्याहुले भन्नु भयो। यसअघि ट्रम्पले घोषणा गरेको सम्झौतापछि हमासले गाजा युद्धविराम सम्झौताको दोस्रो चरणका लागि तयार पारिएको पछिल्लो कार्ययोजनामा सहमति जनाएको थियो । तर उसले हतियार व्यवस्थापन सम्बन्धी विषयमा केही सर्त राखेको थियो । हमासले इजरायली आक्रमण पूर्ण रूपमा रोक्नुपर्ने, गाजाबाट इजरायली सेना फिर्ता हुनुपर्ने र पुनर्निर्माण प्रक्रियामा ठोस प्रगति हुनुपर्ने सर्त पूरा भएपछि मात्र हतियारसम्बन्धी व्यवस्था अघि बढाउन सकिने जनाएको थियो । यसैबीच, पछिल्ला दिनमा गाजामा भएका इजरायली हवाई आक्रमणमा दर्जनौं मानिसको मृत्यु भएको समाचार सार्वजनिक भएको छ । मारिनेमा बालबालिका र अन्य सर्वसाधारणसमेत रहेको बताइएको छ ।
घटनापछि गाजा युद्धविराम वार्तामा मध्यस्थता गर्दै आएका कतार, इजिप्ट र टर्कीले सोमबार संयुक्त रूपमा इजरायली आक्रमणको निन्दा गरेका छन् । उनीहरूले युद्धविराम प्रक्रियालाई कमजोर पार्ने कुनै पनि गतिविधि रोक्न सम्बन्धित पक्षलाई आग्रह गरेका छन ।गाजामा जारी द्वन्द्व अन्त्यका लागि विभिन्न चरणमा वार्ता भइरहे पनि सेना फिर्ता, हमासको हतियार व्यवस्थापन र पुनर्निर्माणका विषयमा इजरायल र हमासबीच अझै गहिरो मतभेद कायम रहेको छ । सीसीटीभी प्लस
