काठमाडौं,१२ असोज । नेपाली कम्युनिष्ट पार्टीकी सांसद बलावती शर्माले बाढीपहिरोबाट बागलुङमा ठूलो जनधनको क्षति भएको भन्दै तत्काल उद्धार, राहत तथा पुनर्निर्माणको व्यवस्था गर्न सरकारसँग माग गर्नुभयो ।
सोमबार प्रतिनिधिसभाको बैठकमा बोल्दै सांसद शर्माले भोटेकोशी बाढीको घाउ सुक्न नपाउँदै असोज ८ गतेदेखि परेको लगातार वर्षासँगै आएको बाढीपहिरोले देशभर र विशेषगरी बागलुङमा थप क्षति पुर्याएको बताउनु भयो ।
उहाँले भन्नुभयो, ‘बागलुङमा असोज १० र ११ गते आएको बाढीपहिरोमा परी १० जनाको मृत्यु भएको छ । ताराखोला गाउँपालिका–५ धम्सारमा घर भत्किँदा ९५ वर्षीय मानबहादुर रोकाको मृत्यु भएको छ ।’
त्यस्तै, निसीखोला गाउँपालिका–३ मा घर भत्किँदा एकै परिवारका श्यामकुमारी विक, मनोज विक, ईरेश विक र निसान विकको मृत्यु भएको उहाँले जानकारी दिनुभयो । निसीखोला गाउँपालिका–६ का सूर्य घर्ती मगरको पनि घर भत्किँदा मृत्यु भएको शर्माले बताउनु भयो ।
तमानखोला गाउँपालिका–३ का बुद्धिराज घर्ती र भीमदेवी घर्ती तथा वडा नम्बर ४ का हस्तवीर सिर्पाली र उदीसरा सिर्पालीको पनि बाढीपहिरोमा परी मृत्यु भएको उहाँले उल्लेख गर्नुभयो । एक जना महिला अझै सम्पर्कविहीन रहेको शर्माले बताउनु भयो ।
उहाँले बाढीपहिरोमा परी ज्यान गुमाउने सबैप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना प्रकट गर्नुभयो ।
सांसद शर्माले बाढीपहिरोबाट विस्थापित नागरिकलाई तत्काल बसोबासको व्यवस्था मिलाउन, उचित क्षतिपूर्ति उपलब्ध गराउन तथा बेपत्ताको शीघ्र खोजी र उद्धार गर्न सरकारसँग माग गर्नुभयो ।
