पाँचथर। ६ मंसिर | फराकिला हरिया पाटन, चिसो सिरेटोमा चरिरहेका चौँरी र भेडाका बथान, आँखैअगाडि उभिएझैँ देखिने हिमाल अनि क्षितिजमा हराउँदै गरेको घाम। प्रकृतिका यी अनुपम दृश्यले पाँचथरको चारराते क्षेत्रलाई पर्यटकको आकर्षक गन्तव्य बनाएको छ।
समुद्र सतहदेखि ३ हजार ५०० मिटर उचाइमा रहेको फालेलुङ गाउँपालिका–४ स्थित चाररातेमा पछिल्लो समय नेपाल र भारतबाट पर्यटकको घुइँचो लाग्न थालेको छ। अहिले दैनिक ३०० देखि ५०० जनासम्म पर्यटक पुग्ने गरेको फालेलुङ कञ्चनजङ्घा पर्यापर्यटन प्रवर्द्धन संस्थाका अध्यक्ष शिल्प साम्पाङ राई बताउनुहुन्छ।
चाररातेको विशेष आकर्षण यहाँबाट देखिने सूर्यास्त र हिमशृङ्खला हो। नेपाल, भारतको सिक्किम र भुटानसम्मका हिमालको दृश्यावलोकन गर्न सकिने यस क्षेत्रमा कञ्चनजङ्घा र कुम्भकर्ण हिमाल क्यामेरामा निकै नजिकबाट खिच्न सकिन्छ। चौँरी तथा भेडीगोठको मौलिक जीवनशैली र फराकिला पाटनमा रमाउने अवसरले पनि पर्यटकलाई लोभ्याउने गरेको छ।










