सुनसरी/ बोलमबमको महिना हो साउन । यो महिना पूर्वको सबै भन्दा महत्वपूणर् तीर्थस्थलको रुपमा बराहाक्षेत्रलाई लिइन्छ । बराक्षेत्र भएर बग्ने सप्तकोशी नदीको पानी धरानको पिण्डेस्वरमा ल्याएर चढाई आफ्नो बोलबम यात्रा पुरा गर्ने चलन छ ।
देशका बिभिन्न स्थलका साथै भारतबाट समेत आउने चतरा तथा बराहक्षेत्र धाम र सप्तकोशी परिसारलाई अहिले सिघार्ने काम सुरु भएको छ । चतरास्थित सप्तकोशी किनारमा रहेको दुर्वासाघाटमा दैनिक सन्ध्याकालीन कौशिकी आरती हुने भएको छ । आरतीका लागि कोशी किनार सरसफाइ गरिएको छ ।
राधाकृष्ण मन्दिर पछाडि रहेको स्नान स्थलमा आज साउन १ गतेदेखि सन्ध्याकालीन आरती सुरु भएको बराहक्षेत्र नगरपालिकाले जनाएको छ ।
नगर प्रहरी र नगरपालिकाका सरसफाइ कर्मचारीको टोलीले आरती स्थलको फोहोर व्यवस्थापन गरिसकेको बराहक्षेत्र नगरपालिकाका नगर प्रहरी कमाण्डर रणबहादुर विष्टले जानकारी दिनुभयो ।
वराहक्षेत्र नगरपालिकालाई पर्यटकीय क्षेत्रको रुपमा विकास गर्ने पूर्वाधारका रुपमा दैनिक आरतीलाई लिइएको नगरपालिकाले जनाएको छ ।
बराहक्षेत्रमा धार्मिक गतिविधि बढाउने समेत उदेश्य रहेको बताइएको छ । नगरले आरतीमा सहभागी हुन आह्वान पनि गरेको छ ।
