दमक, २९ भदौ । दमक क्षेत्रका एकजना सर्जक एवम् शिक्षासेवी हेम अधिकारीले दमक नगरपालिकाले गठन गरेको दमक प्रज्ञा प्रतिष्ठान चाँडो व्यूँताउनु पर्ने बताउनु भएको छ ।
उज्यालो खबरले प्रत्येक शनिवार सञ्चालन गर्दै आएको साहित्य र कलाको विचार विमर्श अनि रचना वाचनको चौतारी कार्यक्रम ‘अनुशीलन’ मा बोल्दै उहाँले सो कुरा बताउनु भएको हो । ०७४ सालको स्थानीय निकायको निर्वाचनपछि दमक नगर कार्यपालिकाको निर्णयबाट ०७६ मा दमक प्रज्ञा प्रतिष्ठान गठन भयो । ०७७ मा ऐन समेत बन्यो । त्यसको अध्यक्ष आफु रहेको अवस्थामा जनप्रतिनिधिको कार्यकाल सकिएपछि सो समिति पनि राजनीतिक चपेटामा परेर हाल पदाधिकारीविहीन बन्नु ज्यादै दुःखद पक्ष रहेको स्मरण गर्नुभयो । ०७९ मा बनेको नगरको नयाँ समितिले प्रतिष्ठानको गठन कार्य गरेको छैन । ‘हामीले बारम्बार कुरा गरिहँदा पनि अहिलेसम्म गठन गरिएको छैन । पुस्तकालय समेत बन्द कोठामा माकुरोको जालो लागेको विजोक अवस्था छ ।’
बुबा पुण्यप्रसाद र आमा सावित्रादेवी अधिकारीको सन्तानका रुपमा विक्रम सम्बत २०१२ साल पुस १६ गते इलाम आमचोक ७ लुङ्सुङ्दाङमा जन्मिनु भएका हेमनाथ अधिकारी साहित्य सृजना क्षेत्रमा हेम अधिकारीका नामले परिचित हुनुहुन्छ ।
नेपाली विषयमा एमएसम्मको अध्ययनगरी माद्यमिक विद्यालयमा उहाँले ३९ वर्ष अध्यापन गर्नुभयो । त्यसमध्येमा ३३ वर्ष त प्रधानाध्यापक नै भएर काम गर्नुभयो । त्यसबीचमा १४ वर्ष क्याम्पस प्रमुख समेत बन्नुभयो । अर्थात उहाँ क्याम्पस र विद्यालयमा गरी निरन्तर ४३ वर्ष अध्यापनकर्म गरेर अहिले अवकासप्राप्त जीवन विताइरहनु भएको छ ।
सांस्कृतिकसहितको चेतनाको क्रान्तिमा सामेल अनि भाषाविज्ञानका क्षेत्रमा क्रियाशील रहँदै आउनु भएका दमक ५ भृकुटी चोक निवासी उहाँ सरल र मृदुभाषी शैलीबाट परिचित हुनुहुन्छ । उहाँको पहिलो साहित्यिक कृतिकारुपमा २०६० सालमा कविता संग्रह ‘वर्तमान र मान्छेहरु’ प्रकाशित भयो । २०६८ मा निवन्ध संग्रह ‘अनुभूतिका तरङ्गहरु’, ०७७ मा आधुनिक भाषाविज्ञानका रुपमा ‘क्रियाको रुप विश्लेषण’, २०८० मा नियात्रा संग्रह ‘उत्तरी ध्रुवतिर टहलिँदा’ र सोही वर्ष आत्मानुभूति संग्रह ‘जीवनका गौँडागल्छेडाहरु’ गरी हालसम्म उहाँका ५ वटा कृति प्रकाशित हुनपुगेका छन् । समालोचनाका २ वटा, निवन्ध र कविताका एकएकवटा पाण्डुलिपिले पनि संग्रहको रुप लिने प्रतिक्षा गरिरहेको छ ।
भाषा साहित्य तथा शिक्षण क्षेत्रमा दर्जनौं पुरस्कार र सम्मान प्राप्त गर्नुभएका उहाँले संगम, सुखानी, चेतना, दमक ज्योति, दमक बालज्योति जस्ता ऐतिहासिक पुस्तक तथा पत्रिकाको सम्पादन समेत गर्नुभएको छ । (भिडियोमा हेरौं उहाँको विचार र रचना प्रस्तुति)
