दमक, फागुन १८
झापाको दमक ५ मा आकर्षक धार्मिकस्थलका रुपमा विकास भएको प्रसिद्ध धनेश्वर शिव पाञ्चायन मन्दिरमा १३ औं पटकको महायज्ञका रुपमा पद्म महापुराण सुरु भएको छ ।
लगातार १८ महापुराण सञ्चालनको लक्ष्य अनुरुप मन्दिरको १३ औं वार्षिकोत्सव समेतका अवसरमा यो पटकको पद्म महापुराण शनिबारबाट कलशयात्रासहित प्रारम्भ भएको छ । दमक नगर प्रमुख रामकुमार थापाको प्रमुख आतिथ्यतामा उद्घाटन कार्यक्रम भएको थियो । सप्ताह महापुराण २३ गतेसम्म सञ्चालन हुनेछ ।
नागले संरक्षण गरेर ओगटिएको जग्गामा धामका रुपमा विकास भएको सो स्थलमा भागवत भूषण पं.उदय शास्त्रीबाट कथा वाचन थालिएको हो । पं.मनिष पोखरेल, पं. बाबुराम दाहाल र पं.योगेश नेपालबाट मुल पाठ पारायण भइरहेको छ । लोकप्रिय भजन गायक महेश खतिवडाको समूहले संगीतमय भजन किर्तन सञ्चालन गरेको मन्दिर समितिका अध्यक्ष रुद्र कार्कीले जनाउनु भयो । धिमाल जातिले ठूलो पिपल र बेलको बोट रहेको सो स्थलमा डांग्रे बाबाका रुपमा पूजा गर्ने गरिएको अवस्थामा १३ वर्ष अघि समिति बनेर यसलाई भौतिक संरचनासहित धामस्थलका रुपमा विकास भएको उहाँले उल्लेख गर्नुभयो । शिव, पार्वती, देवीसहितका विभिन्न प्रतिमासहितका मन्दिर, हल निर्माण भएको र अब पाकस्थल निर्माणको आवश्यकता रहेको औंल्याउनु भयो ।
त्यहाँ ठूलो आधारको शिवको प्रतिमा, पार्वती गुफा र नागपोखरीसहितको स्थल धार्मिक पर्यटनको आकर्षणस्थल बनेको छ ।
