विराटनगर, चैत १०
प्रेस चौतारी नेपालको आजबाट ३ दिनसम्म विराटनगरमा चल्ने केन्द्रीय महाधिवेशनको उद्घाटनमा कार्यव्यस्तताका कारण प्रधानमन्त्री एवं नेकपा एमालेका अध्यक्ष केपी शर्मा ओली आउन नभ्याउने अवस्था भएपछि महासचिव शंकर पाेखरेलले उद्घाटन गर्नु भएको छ ।
होटल मनासलु इनमा पोखरलले महाधिवेशनको उद्घाटन गर्नुभयो । ‘समृद्धिका लागि सञ्चार प्रेस चौतारीको आधार’ भन्ने मूल नाराका साथ हुन लागेको महाधिवेशनमा झण्डै ९ सय प्रतिनिधिले सहभागिता जनाएको अध्यक्ष गणेश बस्नेतले जनाउनु भयो ।
महाधिवेशनले पत्रकारिता क्षेत्रका समस्या र आगामी योजनाको बारेमा तथा भावी नेतृत्व चयन गर्नेछ ।
अध्यक्षमा पाण्डे र राई तथा महासचिवमा अधिकारीको उम्मेदवारी घोषणा
चौतारीको भावी अध्यक्षका लागि उपाध्यक्ष गणेश पाण्डे र राजेश राईले उम्मेदवारी घोषणा गरिसक्नु भएको छ । महासचिवमा चेतन अधिकारीले पनि उम्मेदवारी घोषणा गर्नुभएको छ । अन्य पदका लागि पनि अनौपचारिक रूपमा उम्मेदवारी घोषणा जारी रहेको बेला नेतृत्व भने सर्वसम्मत नेतृत्व चयनको लागि प्रयासमा लागेको छ ।
