दमक, चैत २० / राम्रो सामान सस्तोमै किन्न कसलाई पो चाह नहोला र ? यदि तपाईंलाई पनि त्यसखाले चाहना छ भनें दमकमा आउनु पर्ने भएको छ ।
तपाईं आफ्नो घरायसी र कार्यालयको काम सकेर फूर्सदको समय मिलाएर नै त्यसखाले सामान किन्ने समय निर्धारण गरिएको छ । अर्थात दमक ६ र ७ को सिमानामा पर्ने पशुहाटको पश्चिम र बसपार्कको पूर्व उत्तरमा रहेको सडकमा साँझ ५ देखि राति ९ बजेसम्म अब सस्तो बजार लाग्न थालेको छ । यातायातका साधनको यात्रालाई व्यवस्थापन गरी सडकको दुबै किनारमा लागेको बजार हेर्दै रमाइलो देखिन्छ ।
होलसेल व्यवसायीको समन्वयपछि स्थानीय व्यवसायीको सक्रियतामा मंगलबारबाट यसखाले आकर्षक बजार लाग्न सुरु गरेको हो । सो बजारमा पुग्नु भएका दमक ७ का राईबहादुर हिङमाङले फरकखाले रमितलाग्दो बजार लागेकोमा खुसी लागेको बताउनु हुन्छ ।
दमक १ नम्बर वडा कार्यालयकी कर्मचारी समेत रहनु भएकी दमक ६ की जोसिला ढुंगानाले यसबेला व्यापारमा मन्दि भइरहेको बेला यसखाले बजार लगाएर सस्तोमा सामान पाउनु खुसीको विषय भएको धारणा राख्नु भयो । ‘यसले सुस्ताएको व्यवसायलाई पनि उठाउने र सेवाग्राहीलाई पनि राहत पुग्ने देखिन्छ ।’– उहाँले भन्नुभयो ।
हनुमान मन्दिर तर्फ जाने सडकमा लागेको बजार उपभोक्तामैत्री रहेको छ । यसलाई दैनिक नियमित रुपमा सञ्चालन गर्ने व्यवसायीहरुको योजना छ । पहिलो दिन फरकखाले बजारको दृष्य हेर्न स्थानीयको निकै भिडभाड देखिएको थियो । सामान किन्नका लागि पनि उस्तै थियो भिड ।
बाहिर भन्दा केही सस्तो मूल्यमा आफूले पनि केही सामान किनेको जनाउँदै यसखाले बजारले स्थानीयलाई सहज बनाउने स्थानीय सकुन पोखरेलले समेत धारणा छ ।
साँझ खाना खाएर परिवारका सदस्य, साथीसंगी घुम्दै बजार हेर्न र सरसामान किन्न जाने हिसाबले यो सजिलो बनेको छ । सो बजारमा विशेषगरी लत्ताकपडा, जुत्ता, इलेक्ट्रोनिक, सजावटका गरगहनालगायतका सामान पाइने गरेका छन् ।
