भद्रपुर, २५ चैत । संसदको उद्योग तथा वाणिज्य र श्रम तथा उपभोक्ता हित समितिका सदस्यहरु यति बेला कोशी प्रदेशका रुग्ण र संकटग्रस्त उद्योगको अनुगमनमा छन् ।
झापा क्षेत्र नम्बर ४ का सांसद तथा उद्योग तथा वाणिज्य र श्रम तथा उपभोक्ता हित समितिका सदस्य एलपी सावाँ लिम्बूको नेतृत्वमा समितिका पाँच जना सदस्य र केही कर्मचारी उद्योगहरुको अनुगमनमा निस्केका हुन् । टोलीमा सांसद सावाँका साथ क्रान्तिका सेजवाल, डोलप्रसाद अर्याल, रुकमणी राना बराइली र सीता मिजार सहभागी हुनुहुन्छ ।
सोमवार बिहान झापा आइपुगेको टोली दिनभर झापाका उद्योगी, व्यवसायी, स्थानीय तहका जनप्रतिनिधि, सरकारी अधिकारी, सञ्चारकर्मी र उपभोक्ता अधिकारकर्मीहरुसँग छलफलमा व्यस्त भयो । सो क्रममा झापाका चिया तथा प्लाईउड उद्योगीहरुले भारत निकासीमा भइरहेको अवरोध फुकाउन समितिसमक्ष आग्रह गरेका छन् ।
त्यस्तै उपभोक्ता अधिकारवादीहरुले भारतबाट आयातित विषादीयुक्त तरकारीले मानव स्वास्थ्यमा गम्भीर असर पु¥याइरहेको भन्दै त्यस्ता खाद्यवस्तुको आयात रोक्नुपर्ने प्रस्ताव गरेका छन् ।
समितिका सदस्यहरुले उदयपुर सिमेन्ट कारखानाका साथै धरानको छाला उद्योग, विराटनगर जुट मिलका साथै सुनसरी मोरङ औद्योगिक करिडोरका अन्य उद्योगहरुको समेत अनुगमन गर्ने कार्यतालिका छ ।
