काठमाडौँ, २६ चैत / चैत १५ मा राजावादीको प्रदर्शनमा भड्किएको हिंसाको घटनाको समीक्षा गर्दै आज राष्ट्रिय प्रजातन्त्र पार्टीले राजतन्त्रकै पक्षमा काठमाडौंको बल्खुमा प्रदर्शन गर्ने भएको छ । जुन प्रदर्शन राजावादी पञ्चायती व्यवस्था फ्याकेको दिवसका रुपमा मनाइने जनआन्दोलन दिवसको विरुद्ध समेतको प्रदर्शन हो ।
राप्रपाको मंगलबारको प्रदर्शन शान्तिपूर्ण नहुन सक्ने बुझाइकै साथ स्थानीय प्रशासनले पार्टीले माग गरेको भृकुटीमण्डपमा अन्य समूहका कार्यक्रमहरु चलिरहेकाले सुरक्षा संवेदनशीलताका कारण त्यहाँ कार्यक्रम गर्न अनुमति नदिइ सिफल वा बल्खुमा कार्यक्रम गर्ने अनुमति दिएको छ । राप्रपाले भृकुटीमण्डपमा आमसभा आयोजना गर्ने गरी चैत २२ मै प्रशासनलाई इमेल पठाएको थियो । भृकुटीमण्डपमा कार्यक्रम आयोजना गर्न अन्य आन्दोलनका कार्यक्रमहरू (शिक्षकहरूको आन्दोलन, राष्ट्रिय जनमोर्चाका कार्यक्रमहरू लगायत पूर्व निर्धारित कार्यक्रमहरू) पनि भइरहेकाले अनुमति दिन नसकिएको प्रशासनको भनाइ छ ।
चैत १५ को घटनाको चौतर्फी आलोचना भइरहेको बेला राप्रपाले राजतन्त्र फर्काउने अभियानस्वरुप सो बेलाको आयोजकमध्येको नवराज सुवेदी नेतृत्वको समूहको समेत सहभागिता रहने भएको छ । सुवेदी संयोजक रहेको समितिका कार्यवाहक संयोजक जगमान गुरुङले राप्रपाको प्रदर्शनमा आफूहरूको साथ रहने बताउँदै राष्ट्रिय झण्डासहित शान्तिपूर्ण रुपमा कार्यक्रममा सहभागी हुन आह्वान गरिसक्नु भएको छ ।
‘अवस्था बदल्न व्यवस्था बदलौँ’ भन्ने मूल नाराका साथ वर्तमान व्यवस्था विरोधी गतिविधि अघि बढाएको राप्रपाले ‘नवीन समझदारी’का लागि भन्दै गर्न लागेको बागमती प्रदेशस्तरीय प्रदर्शनलाई शान्तिपूर्ण बनाउनुपर्ने चुनौती रहेको छ । चैत १५ को मूल आयोजक राप्रपा नभएको परिस्थितिमा भएको घटनालाई चिर्न राप्रपाले शान्तिपूर्ण प्रदर्शन गर्दै उदाहरणीय दलको रूपमा उभ्याउन योजना बनाएको राप्रपा प्रवक्ता मोहन श्रेष्ठले बताउनु भयो ।
घुसपैठ भए आफैं प्रतिकार गर्ने
सोमबार बसेको राप्रपा केन्द्रीय कार्यसम्पादन समितिको बैठकले बल्खुमा हुने आमसभालाई शान्तिपूर्ण बनाउन हजारौँ स्वयंसेवक खटाउने र आमसभामा घुसपैठ भए प्रतिकार गर्ने चेतावनी दिएको प्रवक्ता श्रेष्ठले जनाउनु भयो ।
चैत १५ मा वर्तमान व्यवस्थाविरोधी राजावादी समूहले राजधानीको तीनकुने क्षेत्रमा गरेको प्रदर्शन हिंसात्मक बन्न पुग्यो । जसको मूल आयोजक दुर्गा प्रसाईँ नेतृत्वको राष्ट्र, राष्ट्रियता, धर्म संस्कृति बचाउ महाअभियान भए पनि त्यसमा बलियो साथ नवराज सुवेदी नेतृत्वको राजतन्त्र पुनर्स्थापनाका लागि संयुक्त जनआन्दोलन समितिको थियो । साथसाथै राष्ट्रिय प्रजातन्त्र पार्टी (राप्रपा) सहित अन्य राजावादी समूहको समेत साथ रहेको थियो । सो प्रदर्शन हिंसात्मक बन्दा दुई जनाको ज्यान जानुका साथै तोडफोड, आगजनी र लुटपाटका घटना समेत भएर शान्ति भड्किएको थियो ।
