दमक, २६ चैत/ दिन दिनै मानिसहरु रहस्यमय रुपमा मृत भेटिने क्रम बढेको छ । अझ महिलाहरु मृत भेटिनु मानवअधिकारको सवालबाट झन संवेदनशील मानिन्छ । यसक्रममा झापा, मोरङ र सुनसरीमा ३ महिलाको शव फेला परेको छ ।
झापाको अर्जुनधारा नगरपालिका १ स्थित हलुवागढ सामुदायिक वनभित्र महिलाको सडेको शव फेला परेको छ । घाँस काट्न गएका स्थानीयले सो वनभित्र आँपखोल्सी भन्ने स्थानमा कपाल र हाडखोर मात्र भएको महिलाको सडिसकेको शव फेला पारेका थिए । मृतक इलाम रोङ गाउँपालिका २ बर्फल्याङ बस्ने ६२ वर्षीया सीतादेवी खड्का भएको इलाका प्रहरी कार्यालय बिर्तामोडका डीएसपी प्रकाश विष्टले जनाउनु भयो । मानसिक अवस्था ठीक नभएकी ती वृद्धा गत माघ २८ गतेदेखि घरबाट हराएको अवस्था थियो ।
उता, सुनसरीको धरान–६ स्थित पाँचकन्या सामुदायिक वनभित्र पनि अर्धनग्न अवस्थामा अन्दाजी ३० वर्षीय महिलाको शव फेला परेको छ । वनमा तत्काल नामथर वतन नखुलेको महिला लसुनेको रुखमा हाते झोलाको फित्ता घाँटीमा बेरिएको अवस्थामा मृत भेटिएकी हुन् । उनको अनुहारमा निलडाम देखिएको छ भने शरीरको तल्लो भाग नाङ्गो अवस्थामा रहेको प्रहरीले जनाएको छ ।
यता, मोरङको विराटनगरस्थित बसपार्कमा रहेको सार्वजनिक शौचालयको छेउमा एक महिला मृत फेला परेकी छन् । मागी खाई हिड्ने अन्दाजी ६० वर्षकी नाम, थर, वतन नखुलेकी महिला मृत फेला परेकी हुन् ।
