दमक, २७ चैत / नेपाल शिक्षक महासंघले आफूहरूको आन्दोलन नयाँ सहमतिका लागि नभएकाले पहिलेको सहमति कार्यान्वयन गर्न सरकारलाई अनुरोध गर्दै वार्ताको औचित्य नभएको धारणा सार्वजनिक गरेको छ ।
महासंघले बुधबार एक विज्ञप्ति जारी गर्दै विगतमा भएका सहमति कार्यान्वयन गर्न सरकारसमक्ष आग्रह गर्दै वार्तामा बस्नुको औचित्य नरहेको धारणा सार्वजनिक गरेको हो ।
मंगलबार शिक्षा, विज्ञान तथा प्रविधि मन्त्रालयद्वारा वार्ता र संवादका लागि आह्वान गरी जारी गरिएको विज्ञप्तिप्रति गम्भीर ध्यानाकर्षण भएको बताउँदै विज्ञप्तिमा अगाडि भनिएको छ ‘हरेक समस्या वार्ता वा संवादबाटै समाधान हुन्छन् भन्नेमा महासंघको दृढ विश्वास छ । तर यस पटक नेपाल शिक्षक महासंघ सरकार समक्ष नयाँ मागपत्र पेश गरी आन्दोलन आएको छैन । यो आन्दोलनको लक्ष्य विभिन्न मुद्दा र विषयमा छलफल गरी नयाँ सहमति गर्नु पनि होइन । यो आन्दोलनको उद्देश्य विगतमा भएका सबै सहमति सम्बोधन हुने गरी गुणस्तरीय विद्यालय शिक्षा, विद्यार्थी र शिक्षक–कर्मचारी मैत्री अग्रगामी विद्यालय शिक्षा ऐन जारी गराउनु हो ।’
२०८० भदौ महिनामा संसदमा दर्ता भई छलफलको लागि संसद्को शिक्षा, स्वास्थ्य तथा सूचना प्रविधि समितिमा पुगेको विद्यालय शिक्षा विधेयकले दर्ता भएको अधिवेशन समेत गरी सांसदका ४ वटा अधिवेशन पार गरिसकेको छ । यतिका अवधि सकिँदा समेत यो विधेयक ऐन बनेर जारी नहुनु आफैमा विडम्बनापूर्ण रहेको महासंघले ठहर गरेको छ ।
अहिलेको अवस्थामा संसद्को वर्षे अधिवेशन तत्कालै सुरु गर्ने, विशेष अधिवेशन आह्वान गर्ने वा अध्यादेश जारी गर्ने मध्ये एउटा विकल्पमार्फत विद्यालय शिक्षा ऐन जारी हुन सक्नेतर्फ महासंघले सरकारको ध्यानाकर्षण गराएको छ । विगतका सहमति कार्यान्वयन गर्ने सन्दर्भमा मन्त्री परिषद्को निर्णयबाट सम्बोधन हुनसक्ने विषयमा शीघ्रातिशीघ्र निर्णय लिँदै ऐन जारी गर्नका लागि माथि प्रस्तावित विकल्पबारे स्पष्टताका साथ पहल भएमा मात्र वार्ताको विश्वसनीय वातावरण निर्माण हुने अध्यक्ष लक्ष्मी किशोर सुवेदी र महासचिव तुलाबहादुर थापाद्वारा हस्ताक्षरित विज्ञप्तिमा उल्लेख गरिएको छ । ‘त्यस्तो अवस्थामा मात्र महासंघ वार्तामा बस्न सक्ने कुरा स्पष्ट गर्दै विज्ञप्ति मार्फत आह्वान भएको अहिलेको वार्तामा बस्नुको कुनै औचित्य नरहेको समेत प्रस्ट्याउन चाहन्छौ ।’ विज्ञप्तिमा भनिएको छ ।
शिक्षक तथा कर्मचारीहरु विद्यालय हड्ताल गरेर ऐन कायाृन्वयनको मागसहित काठमाडौं केन्द्रित आन्दोलनमा दैनिक प्रदर्शनमा उत्रिएका छन् ।
