विराटनगर, ३ बैशाख / विराटनगरको वीरेन्द्र सभागृहमा बैशाख १८ र १९ गते हुने कोशी प्रदेश लगानी सम्मेलनमा १ खर्ब ३९ अर्ब रूपैयाँ रुपैयाँको ५४ वटा परियोजना सोकेसमा राखिएको छ ।
सम्मेलनको तयारीबारे बुधबार आयोजित पत्रकार सम्मेलनमा कोशी प्रदेशका मुख्यमन्त्री हिक्मत कुमार कार्कीले सम्मेलनको तयारी पुरा भएको जानकारी दिनुभएको छ ।
उहाँले लगानी सम्मेलनले कोशी प्रदेशमा लगानीको वातावरण निर्माण हुने र यसले रोजगारी सिर्जनामा सहयोग हुने बताउँदै लगानी सम्मेलन मार्फत राष्ट्रिय पुँजीको विकास हुने धारणा राख्नुभयो । सम्मेलनमा १ खर्ब ३९ अर्ब रूपैयाँ रुपैयाँको परियोजना सोकेसिङ गर्ने तयारी गरिएको उल्लेख गर्नुभयो । प्रदेश सरकारले ५४ वटा योजनाहरू लगानी सम्मेलनको सोकेसमा राख्ने तय गरेको छ । सम्मेलनका लागि ८ क्षेत्रका सवासय वटा योजनाहरु आएको पनि जानकारी गराउनु भयो ।
सोकेस गर्ने आयोजना, लगानीका लागि रहेको बाधा हुने खालका कानुन संशोधन गर्ने प्रकृया लगायतका सबै विषयमा तयारी पूरा भएको समेत उहाँले बताउनुभयो ।
लगानी सम्मेलनमा मुख्य गरी पर्यटन क्षेत्रका योजनाहरु समेटिएको र त्यसबाहेक उद्योग र आइटी क्षेत्रलाई पनि समेटेको मुख्यमन्त्री कार्कीले जानकारी दिनुभयो । मुख्यमन्त्री कार्कीले संघीय सरकारसँगको समन्वयमा कानुन संशोधन र आवश्यक पर्ने नीतिहरू संशोधन गर्नुपर्ने पनि उल्लेख गर्नुभयो ।
पत्रकार सम्मेलनमा बोल्दै कोशी प्रदेशका आन्तरिक मामिला तथा कानुन मन्त्री रेवतीरमण भण्डारीले लगानी सम्मेलनका लागि सबै खालका कानुनी अड्चनहरू फुकाउने गरी काम भइरहेको बताउनुभयो । लगानी सम्मेलनलाई लक्षित गरेर कानुनहरु संशोधन गर्ने र नयाँ कानुन बनाउने काम भइरहेको उहाँले बताउनु भयो । ८ वटा प्रदेश कानुन संशोधन गर्ने र एउटा नयाँ कानुन बनाउने क्रममा रहेको उहाँले जानकारी दिनुभयो ।
पहिलो पटक आयोजना गर्न लागिएकोले स्थानीय तह, संघीय सरकार र निजी क्षेत्रको सहकार्य र समन्वयमा लगानी सम्मेलनको तयारी अघि बढेको मन्त्री भण्डारीले बताउनु भयो ।
कोशी प्रदेशमा सार्वजनिक, निजी साझेदारी अन्तर्गतका परियोजनाहरूलाई कार्यान्वयनका लागि सरलीकृत वातावरण निर्माण गर्न कानुनी, नीतिगत सुधार र प्रशासनिक सहजता प्रदान गर्ने मन्त्री भण्डारीले जानकारी दिनु भयो ।
पर्यटन क्षेत्रमा १५ वटा भौतिक पुर्वाधारमा १४ कृषिका ९, उद्योग सम्बन्धि ९ वटा, सूचना प्रविधि क्षेत्रमा २ र वेस्ट म्यानेजमेन्ट क्षेत्रमा २ वटा परियोजना समावेश गरिएको लगानी प्राधिकरणका कार्यकारी अधिकृत सरोज कोइरालाले उल्लेख गर्नुभयो ।
लगानी सम्मेलनमार्फत होटल, रिसोर्ट, वाटर पार्क लगायत समेत योजना सोकेशिङ भएका छन । यसै गरि सञ्चालनमा रहेका केही परियोजनालाई समेत सोकेसिङमा राखिएको छ । सम्मेलन सफल बनाउन विभिन्न समितिहरू गठन भइसकेका छन् । नीतिगत, कानुनी सुधार तथा प्रशासनिक सहजताका पक्षमा पनि तयारी अघि बढाइएको छ ।
