मकवानपुर, ५ बैशाख / नेपालकै ऐतिहासिक मकवानपुरको हेटौँडा सिमेन्ट उद्योग छ महिनापछि पुनः सञ्चालनमा आएको छ ।
उद्योगका यन्त्रको मर्मतसम्भार र कच्चा पदार्थको आपूर्ति भएपछि सिमेन्ट उत्पादनमा चुनढुङ्गा तयार पार्न थालनी भएको उद्योगका निमित्त महाप्रबन्धक नवीनकुमार कर्णले जनाउनु भयो । उहाँका अुनसार एक दुई दिनपछि सिमेन्ट उत्पादन थालिने छ । अब दैनिक रुपमा ६०० क्विन्टल सिमेन्ट उत्पादन गर्ने लक्ष्य राखिएको पनि कर्णले उल्लेख गर्नुभयो ।
विसं २०३३ मा जडान गरिएका यन्त्र थोत्रा भएकाले नयाँ खरिद गर्नुपर्ने आवश्यकता देखिएको उद्योगको ठहर छ ।
उद्योग रुग्ण अवस्थामा छ । नेपाल विद्युत् प्राधिकरणलाई बिजुली महसुल र कर्मचारीलाई पारिश्रमिकको व्यवस्था गर्न कठिन भइरहेको छ । यस अवस्थामा सरकारले नै नयाँ यन्त्र उपकरण खरिद गरी उद्योगको व्यवस्थापनमा सघाउन आवश्यक देखिएको उद्योगका निमित्त महाप्रवन्धक कर्णको ठहर छ ।
