काठमाडौं, ७ बैशाख / राष्ट्रिय प्रजातन्त्र पार्टीले निषेधित क्षेत्र तोड्ने गरी आइतबार प्रदर्शनको तयारी गरेपछि शिक्षक सेवा ऐन जारीको माग गर्दै आन्दोलित शिक्षकहरुको आन्दोलनलाई असर पुगेर उनीहरुले आन्दोलनको समय फेरेका छन् ।
आइतबारदेखि शिक्षकहरुले बिहान ९ बजे नै माइतीघरमा प्रदर्शन सुरु गरेर १२ बजे सिध्याउने र राप्रपाका लागि सडक खाली गरिदिने भएका हुन् ।
आफूले १८ दिनदेखि ‘कब्जा’ गरिरहेको बबरमहलको सडक शिक्षकहरुले १९ औं दिनदेखि राजावादीलाई छाडिदिएको देखिन्छ ।
गत चैत २० देखि माइतघर–बानेश्वर सडकमा शिक्षकहरुले दिउँसो १२ देखि नियमित प्रदर्शन गर्दै आइरहेका थिए । राप्रपाले प्रदर्शनको तयारी गरेपछि शिक्षकहरु पछि हट्ने निर्णयमा पुगेका हुन् । पछिल्लो समय शिक्षक आन्दोलनमा देशैभरिका शिक्षकहरुको सहभागिता बढ्दै गएको छ ।
संस्थागत विद्यालयसमेत बन्द गरी आन्दोलनमा आउन आन्दोलनको नेतृत्व गरिरहेका नेपाल शिक्षक महासंघका अध्यक्ष लक्ष्मीकिशोर घिमिरेले पछिल्लो समयमा आव्हान गर्नुभएको छ ।
प्रधानमन्त्री केपी शर्मा ओली र सभामुख देवराज घिमिरेसँग छलफल गरे पनि आन्दोलन जारी राखेका शिक्षकहरुले माग पूरा नभएसम्म पछि नहट्ने बताएका छन् ।
