काँकरभिट्टा, १२ वैशाख । चार सातादेखि इलाका प्रहरी कार्यालय काँकरभिट्टामा थुनिएका चार जना भुटानी शरणार्थी आज साँझ थुनामुक्त भएका छन् । सर्वोच्च अदालतले विहीवार ती शरणार्थीलाई थुनामुक्त गर्न आदेश दिएपछि आज उनीहरुलाई थुनामुक्त गरी बेलडाँगी शिविर पठाइएको हो ।
अमेरिकाले भुटान डिपोर्ट गरे पनि भुटान सरकारले नेपालतिरै लखेट्दा १३ जना भुटानी शरणार्थी आश्रय खोज्दै भारतीय सीमासम्म आइपुगेका थिए । तीमध्ये चार जनालाई अध्यागमन विभागले २८ दिनदेखि प्रहरी हिरासतमा राखेर अनुसन्धान गरिरहेको थियो । प्रहरी नियन्त्रणमा रहेका चार जनामध्ये आशिष सुवेदी, सन्तोष दर्जी र अशोक गुरुङले दमकको बेलडाँगी शिविरमा बस्ने इच्छा गरेका छन् भने रोशन तामाङ मोरङको पथरी शनिश्चरे शिविरमा बस्ने भएका छन् ।
सर्वोच्चको आदेशअनुसार बेलडाँगीमा रहने तीन जनाले दमक नगरपालिकाभित्र मात्रै हिँड्डुल गर्न पाउनेछन् भने तामाङ पथरी शनिश्चरे नगरपालिकाभरि आवातजावत गर्न पाउनेछन् । सर्वोच्चले ‘स्थान हद’ तोक्न भने अनुसार यसो गरिएको हो ।
शिविरमा रहँदा यी चारै जना शरणार्थीले हरेक हप्ता नजिकको प्रहरी कार्यालयमा उपस्थित हुनुपर्नेछ । २८ दिनदेखि नेपाल प्रहरीको थुनामा रहेका भुटानी शरणार्थी युवाहरुलाई थुनामुक्त गर्न माग गर्दै आशिष सुवेदीका बुवा नारायणकुमार सुवेदीले बुधबार सर्वोच्च अदालतमा बन्दी प्रत्यक्षीकरणको रिट दायर गर्नुभएको थियो ।
सर्वोच्चका न्यायाधीशहरू बालकृष्ण ढकाल र नित्यानन्द पाण्डेयको इजलासले शरणार्थीहरूलाई स्थान हद तोकेर प्रहरी कार्यालयबाट स्थानान्तरण गर्न र ६० दिन भित्र अनुसन्धान सक्न आदेश दिएको थियो । अधिकारकर्मीहरु सर्वोच्चको यो आदेशले शरणार्थीमाथि थप अन्याय भएको टिप्पणी गर्छन् ।
