दमक, १३ बैशाख / एनसेल सुपर लिग फुटबल प्रतियोगिताको उपाधिका लागि आज साँझ साविक विजेता ललितपुर सिटी एफसीले पहिलो पटक फाइनल पुगेको पोखरा थण्डर्ससँग सामना गर्ने कार्यक्रम छ ।
दुवै टोली उपाधि जित्ने लक्ष्यका साथ त्रिपुरेश्वरस्थित दशरथ स्टेडियममा साँझ ६ बजे फाइनल खेल प्रतिष्पर्धा सुरु हुनेछ ।
ललितपुरले लिग चरणमा सबै ६ खेलमा अपराजित रहँदै क्वालिफायर वानमा स्थान बनाएको थियो ।
पोखराले भने सुरुवाती दुई खेलमा पराजित हुँदै लिग सुरुवात गरेको थियो । तर लिगमा त्यसपछिका ४ र प्लेअफमा २ गरी पोखरा पनि पछिल्ला ६ खेलमा अपराजित रहेको अवस्था छ ।
यी दुवै टिमले फाइनल पुग्ने क्रममा एकै टिम धनगढी एफसीलाई हराएका थिए । ललितपुरले पहिलो क्वालिफायरमा धनगढी एफसीलाई २–१ ले पराजित गर्दै लगातार दोस्रो पटक फाइनल पुगेको हो भने पोखराले दोस्रो क्वालिफायरमा धनगढीलाई नै १–० ले हराएर पहिलो पटक फाइनलमा स्थान बनाउन सक्यो ।
दोस्रो संस्करणको अन्तिम ३ खेल र यस पटकको ७ गरी ललितपुर लगातार १० खेलमा अपराजित छ ।
