विर्तामोड, २० वैशाख । विश्व प्रेस स्वतन्त्रता दिवसलाई आज संसारभरका पत्रकारले उत्सवका रुपमा मनाए ।
यो उत्सवमा सहभागी भइरहँदा नेपाली पत्रकारहरुले भने ठूलो चुनौती सामना गरिहेका छन् । पछिल्ला केही वर्षयता विश्व जगतले भोगेको आर्थिक मन्दीको छायाँले पत्रकारलाई पनि छाडेको छैन । नेपालजस्तो कम विकसित मुलुकका पत्रकार र मिडियाहाउसले कोभिडकाल यता बाँच्नकै लागि ठूलो संघर्ष गर्नुपरेको छ । सरकार, राजनीतिक दल, उद्योगी व्यवसायीमात्र होइन मिडियाप्रति उदारभाव देखाउने पक्ष भेट्नै मुस्किल पर्न थालेको छ । जसका कारण प्रेस स्वतन्त्रताको पाटो ओझेलमा पर्दै गएको आम पत्रकारको वुझाइ छ ।
यस्तो अवस्थामा नेपाल पत्रकार महासंघ झापा शाखाले विश्व स्वतन्त्रता दिवसको मौका छोपेर शनिवार राजनीतिक दलहरुसँग प्रेस स्वतन्त्रताको पक्षमा प्रतिवद्धता खोज्दै अन्तरसंवाद कार्यक्रम राखेको थियो ।
तर महासंघले जे उद्देश्यले कार्यक्रम राखेको थियो, कतिपय दलका नेताले त्यसको ठीक विपरीत व्यवहार देखाए । यो मामिलामा पुराना र ठूला भनिएका दलभन्दा नयाँ र साना दलका नेताहरु अग्रपंक्तिमा देखिए ।
अझ सीके राउत नेतृत्वको जनमत पार्टीका स्थानीय नेता भोटलाल राजवंशीलेत पत्रकारलाई शव्दैपिच्छे ‘झोले’ सम्बोधन गरिरहनुभयो । ‘ म २०५८ सालदेखि माओवादी युद्ध लडेर यहाँसम्म आइपुगेको हुँ । यो बीचमा मैले किसान र तल्लोवर्गका मान्छेका बारेमा लेल्ने पत्रकारै भेटेको छैन । सबै ‘झोले’ मात्र देखेृको छु ।’—राजवंशी भन्दै हुनुहुन्थ्यो ।
आफ्नो मन्तव्यका क्रममा पटक—पटक झोले भन्दै होच्याउन थालेपछि केही सञ्चारकर्मीले प्रतिवाद गरे । पत्रकार महासंघको कार्यक्रममा उपस्थित भएर पत्रकारहरुलाई नै ‘झोले’जस्तो निकृष्ट शव्द प्रयोग गर्ने राजवंशीले त्यसपछि मञ्च छाड्नुप¥यो ।
राजवंशीमात्र होइन, अन्तरसंवादमा सहभागी अधिकांश राजनीतिक दलका नेताहरुले सञ्चारकर्मीका पछिल्ला गतिविधिमाथि तीतो पोखे । नेपाल कम्युनिष्ट पार्टीका इन्चार्ज सुमनसिंह सी, राष्ट्रिय स्वतन्त्र पार्टीका शम्भु सुस्केरा, राप्रपाका केशव ओझा लगायतका नेताको अभिव्यक्तिमा सञ्चारकर्मीमाथि राजनीतिक वृत्तमा निकै गुनासो बढेको झल्कन्थ्यो ।
ठूला दल एमाले, काँगे्रस र माओवादी केन्द्रका नेताहरुले पनि घुमाउरो शैलीमा पत्रकारिता क्षेत्रमा देखिएका विकृति, विसंगति औंल्याए ।
समस्यै समस्याको चाङमा रुमल्लिएको पत्रकारिता क्षेत्रमाथि लोकतन्त्रवादी भनिने राजनीतिक दलका नेताहरु नै किन सकारात्मक बन्न सकिरहेका छैनन् त ? यसको खोजी मिडिया क्षेत्रबाटै गर्न जरुरी छ । अन्तरसंवादका क्रममा अग्रज पत्रकार माधव विद्राेहीकाे आशंका थियो—‘ हामी सञ्चारकर्मीहरु नै कतै गलत त छैनौं ?’
