पथरी, २१ बैशाख । मोरङको पथरी शनिश्चरेमा आदिवासी जनजातिहरूको अधिकार सम्बन्धी २ दिवसीय सचेतना कार्यक्रम सम्पन्न भएको छ ।
पहिलो नागरिक धिमाल व्यवस्थापन समिति पथरी शनिश्चरेको आयोजना तथा पथरी शनिश्चरे नगरपालिकाको सहयोगमा सो कार्यक्रम सञ्चालन भएको हो ।
पहिलो नागरिक धिमाल व्यवस्थापन समिति पथरी शनिश्चरेका अध्यक्ष भुवन धिमालको अध्यक्षताको कार्यक्रममा धिमाल जाति विकास केन्द्र सचिव तथा पहिलो नागरिक व्यवस्थापन समितिका सल्लाहकार रोमान्सी धिमाल , समितिका सल्लाहकार – तिलक धिमाल, आदिवासी जनजाति महासंघ पथरी शनिश्चरे नगर अध्यक्ष देवेन्द्र वनेम लगायतले मन्तव्य राख्नुभएको थियो ।
मन्तव्यका क्रममा उहाँहरुले नगरपालिकाले पहिलो जाति भनेर धिमाल जातिलाई घोषणा गरे पनि उनीहरूको हक हित र अधिकार संरक्षणका लागि देखिने कुनै उदाहरणीय कार्य नगरेको भन्दै गुनासो पोख्नुभयो । उहाँहरुले धिमाल समुदायलाई राजनैतिक, ,आर्थिक, शैक्षिक, सामाजिक, स्वास्थ्य , रोजगारी जस्ता अधिकारहरू सम्बन्धी स्थानीय तह अन्तर्गतका पालिकाहरूबाट विशेष आरक्षण सहितको अधिकार सुनिश्चित गरिदिन जोडदार माग गरिएको छ ।
केहि वर्षअघि नै पूर्वी मोरङका उर्लाबारी, पथरी शनिश्चरे, लेटाङ, कानेपोखरी र बेलबारी लगायतका पालिकाहरूले यो जातिलाई पहिलो जातिको रुपमा आफ्नो पालिकामा घोषणा गरिसकेका छन् ।
तालिममा सहभागी प्रशिक्षार्थीहरूलाई आदिवासी जनजाति महासंघ झापाका पूर्व अध्यक्ष प्रेम घिसिङले सहजीकरण गर्नुभयो । कार्यक्रममा सोही समितिका सल्लाहकार विष्णु धिमाल समेतको उपस्थिति रहेको थियो ।
