दमक, २२ बैशाख / झापाको कमलस्थित पाडाजुँगी सडकखण्डमा आज साँझ भएको सडक दुर्घटनामा ४ जना घाईते भएका छन् ।
दमकबाट पाडाजुँगी तर्फ जाँदै गरेको ना.१ क ७६७६ नम्बरको ट्रिपर र विपरीत दिशाबाट आउँदै गरेको को. १ च ७९६९ नम्बरको कार र सोही कार पछाडी आउँदै गरेको प्रदेश १–०१–०१६ प ४३९२ नम्बरको मोटरसाइकल समेत ठक्कर खाँदा दुर्घटना भएको हो ।
दुर्घटनामा परि कार चालक जिल्ला सुनसरी धरान उपमहानगरपालिका वडा न. ११ बस्ने बर्ष ६८ को जीवन कुमार विश्वकर्मा घाइते बन्नु भएको छ । उहाँको छात्तीमा चोट लागे पनि अवस्था बोल्न सक्ने मध्यम रहेको प्रहरीले जनाएको छ । यस्तै, कारमा यात्रारत इटहरी उपमहानगरपालिका वडा न. ८ बस्ने ५३ वर्षीय राजु गहतराजको टाउको र दुबै खुट्टामा चोट लागेको छ ।
सोहि ठाउँका ३१ वर्षीय भिम गहतराजको दाहिने खुट्टा भाँच्चिएको प्रहरीले जनाएको छ । मोटरसाइकल चालक झापा कमल गाउँपालिका वडा न. ६ बस्ने १८ वर्षीय सोहत भुजेलको दाहिने खुट्टामा सामान्य चोट लागेको छ । सबै घाईतेहरुको दमक ९ स्थित निम्स नेशनल हस्पिटलमा उपचार भइरहेको जिल्ला प्रहरी कार्यालय झापाले जनाएको छ ।
घटनास्थलमा इलाका प्रहरी कार्यालय दमकबाट प्रहरी टोली खटिगई घटनाको अनुसन्धान अघि बढाइएको छ ।
यसैगरी आजै दमकमा पनि ट्रिपरले ठक्कर दिदा पैदलयात्री गौरादह ४ निवासी ४८ वर्षीया सीता वर्देवालाई ठक्कर दिएर घाइते बनाएको थियो ।
