दमक, १ जेठ \ दमक नगरपालिका शिक्षा समितिका संयोजक तथा दमक वडा नं. ९ का अध्यक्ष कुवेरप्रसाद भट्टराईले शिक्षामा विभेद गर्नु दण्डनीय हुने बताउनु भएको छ । उहाले शिक्षालाई गुणस्तरीय बनाउन अभिभावक र विद्यालय प्रशासनको समान दायित्व र भूमिका रहनुपर्ने बताउनु भयो ।
झापाको दमक ४ चियादोकानस्थित अर्किड एकेडेमी स्कूलले आयोजना गरेको सांस्कृतिक कार्यक्रमलाई प्रमुख अतिथिको आसनबाट सम्बोधन गर्दै उहाँले यस्तो बताउनु भएको हो । बिहिबार स्कूल परिसरमा आयोजना गरिएको साँस्कृतिक कार्यक्रममा विद्यालयका नर्सरीदेखि कक्षा ६ सम्मका विद्यार्थीहरुले आफ्नो कला प्रस्तुत गरेका थिए । जसमा सामूहिक नृत्य, बाल नृत्य, गायनलगायतका प्रस्तुतिहरु प्रस्तुत गरेर अभिभावकलाई मनोरञ्जन प्रदान गरिएको थियो ।
कार्यक्रममा अघिल्लो शैक्षिक वर्षका उत्कृष्ट अंक ल्याउने विद्यार्थीहरुलाई पुरस्कृत गर्नुका साथै अनुशासित र जेहेन्दार तथा सरसफाई र पोसाकमा ध्यान दिने विद्यार्थीहरुलाई ताज पहिर्याउँदा विद्यार्थीहरु उत्प्रेरित देखिएका थिए ।
कार्यक्रममा अभिभावकको तर्फबाट मन्तव्य राख्दै सञ्चारकर्मी विमल लामिछानेले अभिभावक र शिक्षक शिक्षिकाको सम्बन्ध नङ र मासुको जस्तो हुन सकेमात्र विद्यालय र विद्यार्थीको विकास हुने उल्लेख गर्नु भयो । उहाँले विद्यालय कुट्ने स्कूल नभई सिक्ने स्कूलको रुपमा परिचय बनाउन सुझाव समेत दिनुभयो ।
कार्यक्रममा विद्यालय प्रिन्सिपल लक्ष्मी नेपालले अभिभावकको रेखदेख र सकारात्मक भूमिकाबाट मात्रै विद्यालय राम्रो बनाउन र विद्यार्थीहरुमा पनि दक्षता बढाउन सकिने बताउनु भयो । उहाँले यस शैक्षिक सत्रबाट विद्यालयमा ई—सेवाको माध्यमबाट विद्यार्थीका गतिविधि र दैनिक क्रियाकलापहरुलाई अभिभावकसँग जोड्ने प्रयत्न गरेको भन्दै अबका दिनमा अभिभावकले घरमै बसेर आफ्ना नानीबाबुहरु स्कूल पसेको र स्कूलबाट निस्किएको जानकारी पाउन सकिने एप सञ्चालन गरिएको जानकारी दिनुभयो ।
