दमक, जेठ ३० | दमक नगरपालिका–५ मा अवस्थित मदरल्याण्ड इङ्लिस बोर्डिङ स्कुलमा डिजिटल साक्षरतासम्बन्धी एक दिवसीय विशेष कार्यशाला सम्पन्न भएको छ। कार्यक्रम विद्यालय र DIGI School टोलीको सहकार्यमा सञ्चालन गरिएको हो।
कार्यशालाको उद्देश्य विद्यार्थीहरूलाई आधुनिक प्रविधिमा आधारित शिक्षामा अभ्यस्त गराउनु रहेको थियो। गत वर्षदेखि लागू गरिएको DIGI School कार्यक्रमअन्तर्गत विद्यालयमा डिजिटल साक्षरता, कोडिङ, गणनात्मक सोच, अनलाइन सुरक्षा तथा सूचना प्रविधिसम्बन्धी विविध ज्ञान प्रदान गरिदै आएको छ।
काठमाडौँबाट आएको DIGI School टोलीले गत बुधबार कार्यशालामा कृत्रिम बुद्धिमत्ता (AI), जीपीएस प्रणाली, नक्शांकन (Mapping) लगायतका विषयमा व्यवहारिक जानकारी प्रस्तुत गरेका थिए।
यसले विद्यार्थीहरूको प्रविधिप्रति रुचि र बुझाइलाई थप सुदृढ बनाएको विद्यालयले जनाएको छ।
विद्यालयका प्रधानाध्यापकले भने, “DIGI School कार्यक्रममार्फत हामी विद्यार्थीहरूलाई भविष्यका लागि अत्यावश्यक प्रविधि सीपहरू सिकाउँदै आएका छौं। यसले उनीहरूको तार्किक सोच, समस्या समाधान गर्ने क्षमता, स्पष्ट निर्णय लिने क्षमतासहित पेशागत भविष्य निर्माणमा ठूलो टेवा पुर्याउने विश्वास लिएका छौं।”
विद्यार्थीहरू डिजिटल प्रविधि शिक्षाबाट उत्साहित देखिए भने अभिभावकहरूले समेत सन्तोष व्यक्त गरेका छन्। एक अभिभावकले भने, “हाम्रा छोराछोरीहरूले यति उपयोगी र भविष्यमुखी ज्ञान पाउनु हाम्रो लागि गर्वको विषय हो।”
विद्यालयले आगामी दिनमा पनि DIGI School कार्यक्रमलाई निरन्तरता दिँदै प्रविधिमैत्री शिक्षाको यात्रालाई अझ सशक्त बनाउने प्रतिबद्धता जनाएको छ।
