दमक| ३ साउन |
झापा जिल्ला प्रहरी कार्यालयले चालु आर्थिक वर्ष २०८१/८२ मा अपराध नियन्त्रणतर्फ सशक्त प्रगति गरेको जनाएको छ। कर्तव्य ज्यान, लागू औषध कारोबार, जबरजस्ती करणी, सवारी ज्यान, आत्महत्या, भन्सार चोरी तथा अवैध काठ कारोबारसम्बन्धी मुद्दामा उल्लेखनीय सुधार देखिएको जिल्ला प्रहरी कार्यालयको तथ्यांकले देखाएको छ।
अघिल्लो वर्षको तुलनामा कर्तव्य ज्यानसम्बन्धी मुद्दामा उल्लेखनीय कमी आएको प्रहरी स्रोतको दाबी छ। “समुदायसँगको सहकार्य, सूचनाको प्रभावकारी उपयोग र समयमै भइरहेको प्रहरी हस्तक्षेपले घटनाहरू घटेका छन्,” जिल्ला प्रहरी स्रोतले भन्यो।
यस्तै, लागू औषध नियन्त्रणमा समेत निर्णायक सफलता मिलेको छ। प्रहरीको सक्रिय गस्ती, सूचना संकलन र गोप्य अपरेसनमार्फत धेरैजना कारोबारमा संलग्न व्यक्ति पक्राउ परेका छन्। लागू औषधसहित पक्राउ परेका अभियुक्तहरूविरुद्ध कानुनी कारबाही अघि बढाइएको जनाइएको छ।
प्रहरी तथ्यांकअनुसार, जबरजस्ती करणी, सवारी ज्यान र आत्महत्या जस्ता संवेदनशील विषयहरूमा पनि प्रहरीको समयमै भएको हस्तक्षेप र जनचेतनामूलक क्रियाकलापले सकारात्मक प्रभाव पारेका छन्।
फरार प्रतिवादी पक्रन विशेष अभियान
फैसला कार्यान्वयनको सन्दर्भमा समेत झापा प्रहरीले उल्लेखनीय प्रगति गरेको छ। विगत वर्षहरुदेखि फरार रहेका प्रतिवादीहरूलाई पक्राउ गरी अदालतमा पेश गर्ने अभियान तीव्र पारिएको छ। “न्यायपालिकाको निर्णयलाई कार्यान्वयन गर्न हामी थप सक्रिय छौँ,” झापा प्रहरीले सार्बजनिक गरेको रिपोर्टमा उल्लेख छ ।
त्यस्तै, भन्सार चोरी पैठारी तथा अवैध काठ कारोबार नियन्त्रणमा पनि प्रहरीले विशेष अनुगमन अभियान सञ्चालन गरिरहेको छ। यस क्रममा धेरै संलग्नहरू पक्राउ परेका छन् भने मुद्दा अगाडि बढाइएको छ।
अझ प्रविधिमैत्री र जनउत्तरदायी प्रहरी व्यवस्था निर्माणतर्फ ध्यान
जिल्ला प्रहरी कार्यालयका अनुसार, अबको प्राथमिकता प्रविधिमैत्री प्रहरी प्रणाली र जनताको विश्वास जित्ने सेवा प्रवाहमा केन्द्रित हुने छ। प्रहरी–नागरिक समन्वयमार्फत अपराध न्यूनीकरणलाई थप प्रभावकारी बनाउने योजना सार्वजनिक गरिएको छ।
झापा प्रहरीको यो गतिविधि नजिर बन्नसक्ने देखिएको छ — जसले अपराध नियन्त्रणका क्षेत्रमा अन्य जिल्लाहरूलाई पनि सन्देश दिनेछ। प्रहरी र नागरिकको सहकार्यबाट शान्ति, सुरक्षा र सुव्यवस्था अझ मजबुत बनाउने कार्यमा झापाले गतिलो उदाहरण प्रस्तुत गरेको छ।
