दमक,५ साउन । सुनसरीको धरानमा तेजाब खाएर सिकिस्त भएका १ जना पुरुषको आइतबार राति मृत्यु भएको प्रहरीले जनाएको छ ।
धरान उपमहानगरपालिका–७ बगैँचा लाइनका अन्दाजी ४४ वर्षीय सरोज विकको मृत्यु भएको जानकारी सुनसरी प्रहरीका प्रवक्ता डीएसपी योगराज खतिवडाले बताउनु भयो । उहाँका अनुसार मादक पदार्थ सेवन (मापसे) गरेका विकले गत असार २३ गते राति तेजाब खाएको प्रारम्भिक अनुसन्धानबाट खुलेको छ ।
घरको धारा सफा गर्नका लागि राखिएको तेजाब विकले खाएको उहाँले बताउनु भयो । तेजाब खानसाथ अवस्था गम्भीर भएका उनलाई उपचारका लागि धरानकै बीपी कोइराला स्वास्थ्य विज्ञान प्रतिष्ठान लगिएको थियो ।
धरानबाट थप उपचारका लागि विराटनगरको विराट नर्सिङ होम पठाइयो । उपचारकै क्रममा २ सातापछि विकको मृत्यु भएको डीएसपी खतिवडाले बताउनु भयो ।
उहाँका अनुसार विकको आइतबार राति १० बजेतिर मृत्यु भएको हो । प्रहरीले घटनाको थप अनुसन्धान गरिरहेको जनाएको छ ।
