दमक, २२ असोज। लगातारको मनसुन र आरीघोप्टे वर्षाले कोशी प्रदेशका सयौं परिवारलाई घरबार बिहिन बनाएको छ। धेरैले आफ्नो थातथलो गुमाएका छन्, जीवन पुनः थालनीको संघर्षमा छन्। यस्तो कठिन समयमा कोशी प्रदेश सरकारका मुख्यमन्त्री हिकमत कुमार कार्कीले बाढीपहिरोबाट विस्थापित परिवारका लागि घर निर्माण गर्ने ऐतिहासिक घोषणा गर्नुभएको छ।
रेडियो किङ एफ एमको कार्यक्रम ‘सत्य संवाद’ मा बोल्दै मुख्यमन्त्री कार्कीले भन्नुभयो “पहिलो चरणमा इलामलाई प्राथमिकता दिएका छौं। त्यहाँ करिब ९६ परिवार घरविहीन भएको बुझिएको छ। ती सबैलाई बस्न योग्य घर प्रदेश सरकारले बनाइदिनेछ।”
मुख्यमन्त्री कार्कीका अनुसार घर निर्माणका लागि आवश्यक जग्गाको व्यवस्था सम्बन्धित स्थानीय तहले गर्ने छ। स्थानीय तहले जग्गा उपलब्ध गराएपछि प्रदेश सरकारले उही दिनदेखि घर निर्माण सुरु गर्ने तयारी गरेको छ।
स्थानीय तहसँग सहकार्यमा नयाँ बस्ती निर्माणको योजना
मुख्यमन्त्री कार्कीले प्रदेश सरकारको उद्देश्य तत्काल राहतमा मात्र सीमित नभई दीर्घकालीन पुनर्स्थापनामा केन्द्रित भएको बताउनुभयो।
उहाँले भन्नु भयो । “हामीले प्रदेशभरका जोखिम क्षेत्र पहिचान गरिसकेका छौं। प्राविधिक अध्ययन भइसकेको छ। अब स्थानीय तह र संघीय सरकारसँग समन्वय गरी नयाँ सुरक्षित बस्ती निर्माणमा जुट्छौं।”
प्रदेश सरकारले पहिल्यै जोखिम मूल्यांकन प्रतिवेदनहरू तयार गरी संघीय र स्थानीय तहलाई पठाइसकेको छ। अध्ययन अनुसार, इलाम, पाँचथर, मोरङ, सुनसरी, ताप्लेजुङ, धनकुटा, सोलुखुम्बु लगायतका जिल्लामा सयौं परिवार बाढीपहिरोको स्थायी जोखिममा छन्।
मुख्यमन्त्रीले स्थानीय तहलाई आग्रह गर्र्दै भन्नु भयो ‘पालिकाहरुले सुरक्षित स्थानको पहिचान र जनसहमति सहितको योजना प्रदेश सरकारलाई पेस गरोस हामी तुरुन्तै योजना कटाएर भएपनि यो काममा लाग्ने छौ ।’ उहाँले दोहोर्याउदै भन्नु भयो । “प्रदेश सरकार नयाँ बस्ती निर्माणमा कुनै कसर बाँकी राख्ने छैन ।”
मुख्यमन्त्री कार्कीले यो अभियान एक वर्षमै सकिने होइन, तर निरन्तर प्राथमिकतामा रहने दीर्घकालीन काम हुने स्पष्ट पार्नुभयो भएको छ ।
“हामी सारा काम एकैपटक गर्न सक्दैनौं, तर प्रत्येक वर्ष यसलाई प्राथमिकतामा राख्छौं। नागरिकलाई सुरक्षित बासस्थान उपलब्ध गराउनु प्रदेश सरकारको प्रमुख जिम्मेवारी हो,” उहाँले भन्नुभयो।
कोशी प्रदेश सरकारले यसअघि जोखिम मूल्यांकनका आधारमा पुनर्वासका लागि बजेट छुट्याउने, र दीर्घकालीन विपद् न्यूनीकरण योजना तयार गर्ने तयारी गरिसकेको पनि उल्लेद गर्नु भएको छ ।
