दमक,१६ कार्तिक । झापाको सरोज साह हत्या काण्डमा सुन कारोबारको बिषय मुख्य कारण रहेको खुलेको छ । सस्तोमा सुन किन्न पाईने प्रलोभनमा परेर छलछाम गरि अपराधीक मानसिकता राख्ने गिरोहले शर्माको बीभत्स हत्या गरेको खुलेको हो । आज जिल्ला प्रहरी कार्यालय झापाले घटनाबारे सार्बजनिक गर्न आयोजना गरिएको पत्रकार सम्मेलन मार्फत यो रहस्य खुलेको हो ।
घटनापछि पक्राउ परेका सुनिल साह र राहुल साहको बयानका आधारमा सरोज शर्माले सस्तोमा सुन पाए केही आफुले किन्ने र काठंमाण्डौमा चिनाजान रहेको मानिसलाई पनि किनाइदिने भनि सुनिल साहलाई सुन खोज्न भनेकोमा सुनिल साहले बिगत १ महिना अगाड देखि नै सरोज शर्मा संग भएको पैसा लुटने र निजलाई अपहरण गरि छिमेकि मुलुकमा लगि घरका आफन्तहरुसंग करोडौ रुपैया असुल्ने योजना बनाएको स्विकार गरेको प्रहरीले जनाएको छ ।
यस्तै सुन ल्याई राखि गाडिएको स्थान हेर्न आउन सरोज सालाइ ललाईफकाई गरि अर्जुनधारा नगरपालिका–४ स्थित दहिझोडा सामुदायिक वनमा बोलाई सुनिल साह र निजकै नातामा भान्जा पर्ने राहुल साहले आफुसंगै लगेको ह्याम्मर ( हथौडा ) लगायतले टाउकोमा प्रहार गरि सोही स्थानमै मारेको समेत अभियुक्तले स्विकार गरेको प्रहरीले जनाएको छ । शनिबार बिहान झापा गाउंपालिका वडा नं .५ स्थित बिरिङ खोलामा रहेको पुलमुनि जमिनमुनि गाडिएको अवस्थामा मृतक शर्माको शव फेला परेको थियो ।
त्यहाबाट बाहिर निकाली अहिले कानूनी प्रक्रिया पश्चात शबलाई पोष्टमार्टमको लागि बि.पि. कोइराला स्वास्थ्य बिज्ञान प्रतिस्ठान धरान पठाईएको पत्रकार सम्मेलनका क्रममा प्रहरी नायव उपरीक्षक खगेन्द्र बहादुर खड्काले जानकारी दिनु भयो ।
