झापा, १७ कात्तिक । आइसीयुको विरामीको मृत्यु ढिलो जानकारी गराएको बिषयमा बीएण्डसी अस्पताल बिर्तामोडमा विवाद भएको प्रहरीले बताएको छ ।
कमल गाउँपालिका –२ केर्खा बस्ने ८३ वर्षीय रंगनाथ पौडेलको मृत्यु भइसकेर अस्पतालले ढिलो जानकारी गराएको विषयमा विवाद भएको छ । पेट दुख्ने बिरामी भई उपचारको लागि बीएण्डसी अस्पतालमा ल्याई उपचार भइरहेकोमा उपचारको क्रममा पौडेलको हिजो आइतबार दिउँसो १ बजे मृत्यु भएको थियो तर उनको मृत्यु भएको ढिलो जानकारी गराएको भन्दै साँझ ५बजेतिर मृतकका आफन्तहरुले अस्पतालमा विवाद गरेको प्रहरीले जनाएको छ । त्यसक्रममा मृतकका आफन्त र अस्पतालका सुरक्षागार्ड बीच कुटाकुट नै भएको प्रहरीले जनाएको छ।
मृतकका आफन्तहरु करिब २० जना भेला भई अस्पताल प्रशासनसंँग विवाद गरेका हुन्। पछि आफन्त र अस्पताल प्रशासनबिच छलफल भई साँझ ५ः५० बजे अस्पताल प्रशासनले सम्झाई बुझाई शव मृतकका आफन्तलाई जिम्मा दिएको बताएको छ । विरामीको मृत्यु भइसक्दा पनि आइसियुको भेन्टिलेटरमा राखेर अस्पतालहरुले रकम असुल्ने गरेको गुनासो जता ततै सुनिने गरेको छ ।
