विराटनगर,२५ मंसिर । कोशी प्रदेशको भौतिक पूर्वाधार तथा विकास मन्त्रालयले १० अर्ब रुपैयाँबराबरको दुई हजार आयोजना ठेक्का प्रक्रियामा लगेको स्रोतले जनाएको छ । मन्त्रालयलले जनाएअनुसार स्रोत सुनिश्चित भइसकेका वहुवर्षीय योजनाबाहेक कुल १९४८ वटा योजना ठेक्का प्रक्रियामा गएका हुन्।
मन्त्रालयका अनुसार मंसिर २० भित्र सबै योजना ठेक्का प्रक्रियामा लैजान निर्देशन दिइएको हो। भौतिक पूर्वाधार तथा विकासमन्त्री भूपेन्द्र राईले भन्नु भयो, “यसबाट सकारात्मक परिणाम देखिएको छ । कतिपय जिल्लाको प्रगति ९७ प्रतिशतसम्म छ ।”
मन्त्री राईले आर्थिक वर्षको अन्तिम चौमासमा ठेक्का लगाउने प्रवृत्ति अन्त्य गर्न आर्थिक वर्षको सुरुवातबाटै काम थालिएको बताउनु भयो । उहाँका अनुसार गत असोज महिनामा बाढीपहिरोबाट बढी प्रभावित भएको इलाम बाहेकका जिल्लामा ठेक्काको प्रगति उल्लेख्य भएको बताउनु भयो । उहाँले भन्नु भयो,“त्यहाँ संघीय सरकारबाट समेत काम हुने भएकाले केही ढिलो भएको देखिएको छ । तर, प्रक्रिया भने सुरु भइसकेको छ ।”
बाँकी कतिपय जिल्लामा जग्गा विवाद देखिएको मन्त्री राईले बताउनु भयो । बहुवर्षीय योजना सिफारिस हुन बाँकी रहेकाले ती पनि चाँडै टुंगो लाग्ने उहाँको भनाइ छ । कोशीमा विगतमा वैशाख–जेठमा पनि ठेक्का खुल्ने गरेको थियो । कतिपय मसिना र साना योजना कोटेसनमार्फत गराइने गरेकामा त्यसलाई मन्त्रालयले रोक लगाएको स्रोतले जनाएको छ ।
मन्त्रालयको तथ्यांकअनुसार रकम विनियोजनका आधारमा सोलुखुम्बुमा ९७ दशमलब १५, मोरङमा ९५.७४, उदयपुरमा ९२.१०, खोटाङमा ९० र पाँचथरमा ८० प्रतिशत, ताप्लेजुङमा ७९.४९, भोजपुरमा ७५.०६, धनकुटामा ७५.५४, सुनसरीमा ७३.४४, तेह्रथुममा ७०.७६, संखुवासभामा ६६.२१, झापामा ६६, ओखलढुंगामा ६४.२१ र इलाममा ५३.१६ प्रतिशत योजना ठेक्का प्रक्रियामा गएको छ ।
यसैगरी, योजना संख्याका अधारमा इलाममा सबैभन्दा कम १५.७०, संखुवासभामा ४६.३०, झापामा ५१, धनकुटामा ५९, सुनसरीमा ६१.४८, मोरङ ६२.४८ र पाँचथरमा ६३.६१ प्रगति देखिएको मन्त्रालयले बताएको छ । खोटाङमा ७२, तेह्रथुम ७४.२९, ओखलढुंगा ७८.३३, भोजपुरमा ८२.२८, उदयपुर ८२.२८, सोलुखुम्बु ८७ र ताप्लेजुङमा ९४.२३ प्रतिशत प्रगति देखिएको जनाइएको छ ।
