पहिले ९९ प्रतिशत विषादी देखिएको रायोको साग अहिले सुरक्षित

दमक, २६ मंसिर । केही समयअघि ९९ प्रतिशतसम्म विषादी मिसिएको भन्दै उपयोग अयोग्य घोषित गरिएको रायोको साग अहिले भने उपभोग योग्य रहेको पुष्टि भएको छ।

दमक नगरपालिकाले नै अघिल्लो पटक सार्वजनिक गरेको परीक्षण प्रतिवेदनमा रायोको सागमा अत्यधिक विषादी देखिएपछि बजारमा तरकारीको गुणस्तरलाई लिएर गम्भीर प्रश्न उठेको थियो। तर पछिल्लो पटक गरिएको पुनः परीक्षणमा सोही रायोको सागसहित दमक बजारका विभिन्न तरकारी नमुनामा विषादी अवशेष तोकिएको सुरक्षित सीमाभित्र रहेको देखिएको नगरपालिकाले शुक्रबार पत्रकार सम्मेलनको आयोजना गरेर सार्बजनिक गरेको छ । नेपाल सरकार, कृषि तथा पशुपन्छी विकास मन्त्रालय अन्तर्गतको केन्द्रीय कृषि प्रयोगशाला तथा विषादी अवशेष द्रुत विश्लेषण प्रयोगशाला इकाइले गरेको परीक्षणमा रायोको साग, काउली, धनियाँ, काक्रो, मुला, फर्सी लगायतका तरकारी नमुना सबै ‘उपभोग योग्य’ वर्गमा परेको नगरपालिकाका नगर प्रमुख राम कुमार थापाले जानकारी दिनुभयो ।

प्रयोगशालाका अनुसार तरकारीमा ३५ प्रतिशतभन्दा कम विषादी अवशेष देखिएमा उपभोग योग्य मानिने मापदण्ड रहेको छ। पछिल्लो परीक्षणमा दमकबाट संकलन गरिएका सबै नमुना सोही मापदण्डभित्र परेका हुन्। यसले अघिल्लो परीक्षणपछि किसान, व्यापारी र सम्बन्धित निकायले विषादी प्रयोगमा सावधानी अपनाएको दावी दमक नगरकी उप प्रमुख रेगिना भट्टराई प्रसाईले गर्नु भयो ।

दमक नगरपालिका र कृषि सम्बन्धित निकायले नियमित परीक्षणलाई निरन्तरता दिने र सुरक्षित उत्पादन तथा उपभोगमा जोड दिने बताएका छन्। अघिल्लो पटकको चिन्ताजनक अवस्थाबाट अहिलेको सुधारिएको नतिजाले उपभोक्तामा केही राहत मिलेको खाद्य निरीक्षक लक्ष्मी न्यौपानेले उल्लेख गर्नुभयो
अघिल्लो पटक ९९ प्रतिशत विषादी भेटिएर उपयोग अयोग्य ठहरिएको रायोको साग अहिले सुरक्षित मापदण्डभित्र परेको छ। यसले परीक्षणपछि गरिएको सुधार र निगरानीले परिणाम दिन थालेको देखाउँछ, तर उपभोक्ताको विश्वास कायम राख्न नियमित अनुगमन अझै आवश्यक छ।