पथरी, २८ मंसिर / गजलकार राहुल शंकरको गजल सङ्ग्रह ‘नयाँ अध्याय’ ले नागरिकता नहुनेहरुले रुँदै देश छोडेको प्रसंग जोडेको छ ।
‘द मार्जिन’ले प्रकाशनमा ल्याएको सो कृतिको काठमाडौंमा लोकार्पण गर्दै वक्ताहरुले देशविहीनताको पीडाले सृजनाको जन्म भएको उल्लेख गरेका छन् । वक्ताद्वय लेखक तथा निर्देशक प्रकाश आङ्देम्बे, गजलकार तथा गीतकार शितल कादम्बिनी, कृतिका लेखक गजलकार राहुल शंकर र प्रकाशक निशेष आङ्देम्बेले एकसाथ सर्वनाम थिएटरको प्रेक्षालयमा कृति लोकार्पण गर्नुभएको थियो ।
नागरिकता बोक्नेहरुले हाँस्दै देश छोडेको र नागरिकता नहुनेहरुले रुँदै देश छोडेको प्रसंग जोड्दै कृतिका लेखक राहुल शंकरमा देशभक्त भावना र उनका सिर्जनाहरु साँच्चिकै देशप्रेमले ओतप्रोत भएको कुरा वक्ता प्रकाश आङ्देम्बेले उल्लेख गर्नुभयो । जो भुटानी शरणार्थीको जल्दोबल्दो प्रसंग थियो । गजलकार शंकर झापाको दमकस्थित भुटानी शरणार्थी शिविर बेलडाँगी १ बाट तेस्रो मुलुक पुनर्वासका क्रममा क्यानडामा बसोबास गर्दै आउनु भएको छ ।
त्यसैगरी अर्का वक्ता शितल कादम्बिनीले ’राहुलका गजलहरु समकालीन नेपाली गजलको दुनियाँमा एक उत्कृष्ट गजल कृतिको रुपमा प्रकाशित भएको बताउनु भयो । कवि तथा गजलकार बाबु त्रिपाठीको सहजीकरणमा सम्पन्न विमोचन कार्यक्रममा सो कृतिबाट कवि प्रज्वल अधिकारी र गजलकार तथा कलाकार संगीता थापाले गजल वाचन गरेका थिए ।
