पथरी शनिश्चरे, १ पुस / मोरङको पथरी शनिश्चरे–२ मा रहेको रेडस्टार अङ्ग्रेजी आवासीय माध्यमिक विद्यालयमा “रेडस्टार नाट्य महोत्सव–२०८२” सम्पन्न भएको छ ।
रेडस्टार नाट्य समूहले अतिरिक्त क्रियाकलाप अन्तर्गत कक्षा ४ देखि कक्षा ८ सम्मका सय भन्दा बढी विद्यार्थीहरूलाई सहभागि बनाइ प्रतियोगितात्मक नाट्य महोत्सवको आयोजना गरेको हो ।
महोत्सवमा १५ वटा व्यक्तिगत विधा तथा २ वटा समूहगत विधा गरी कुल १७ विधामा उत्कृष्ट प्रतिभाहरूलाई पुरस्कार प्रदान गरिएको विद्यालयका निर्देशक तथा प्रिन्सिपल टीएन. तिम्सिनाले जानकारी दिनुभएको छ ।
उहाँले विद्यार्थीहरूको अत्यधिक सहभागिता र आकर्षक प्रस्तुतीकरणले आगामी दिनमा अझ बृहतस्तरको महोत्सव आयोजना गर्ने प्रेरणा मिलेको जनाउनु भयो । महोत्सवले रेडस्टारलाई पुनः सिर्जनात्मक विद्यालयको रूपमा उजागर गरेको उहाँले उल्लेख गर्नुभयो ।
विद्यार्थीहरूमा सिर्जनशीलता, आत्मविश्वास र अभिनयकौशलताको विकास गर्ने उद्देश्यले आयोजित महोत्सव अत्यन्तै उत्साहजनक र रंगिन बनेको चलचित्रकर्मी तथा विद्यालयका अभिनय प्रशिक्षक जीवन बरालले जानकारी दिनुभयो । सो महोत्सवमार्फत विद्यालयका विद्यार्थीहरूलाई मञ्चीय कलासँग नजिक गराउँदै समूहगत सहकार्य र व्यक्तित्व विकासमा ठूलो योगदान दिएको बरालले सुनाउनु भयो।
विभिन्न राजनीतिक तथा सामाजिक विषयवस्तुहरूमा छात्रछात्राहरूले नाटकहरू प्रस्तुत गरेका थिए ।
