कन्काई, ७ पुस । गत भदौ २४ गते देशका देशका धेरै स्थानीय तहका प्रशासनिक भवनमा आगजनी भयो । जेनजी आन्दोलनका नाममा सल्किएको आगोले झापाका एक दर्जन स्थानीय तहका प्रशासनिक भवन र चार दर्जन बढी वडा कार्यालय खरानी बनायो ।
जेनजी आन्दोलनको बहानामा सल्किएको आगोले कन्काई नगरपालिकाको प्रशासनिक भवनदेखि सबै वडा ध्वस्त पारेको थियो । प्रशासनिक भवनसँगै पालिकाको स्वामित्वमा रहेका केही सवारी साधन पनि जले ।
कन्काई अव त्यो पीडा भुल्ने प्रयासमा छ । भदौ २४ को आगजनी र तोडफोडमा ६ करोड बढीको भौतिक क्षति बेहोरेको यो नगरले आफूजस्तै समस्यामा परेका अरु निकायलाई सहयोग दिन थालेको छ । सोही क्रममा सोमबार नगरपालिकाले इलाका प्रहरी कार्यालय सुरुङ्गालाई गाडी प्रदान गरेको छ ।
नगरपालिकाका उपप्रमुख आशा शिवकोटीले प्रयोग गर्दै आउनुभएको सो गाडी प्रहरीलाई हस्तान्तरण गर्दै नगरप्रमुख राजेन्द्रकुमार पोखरेलले भन्नुभयो–‘हामीले आफूसँग धेरै भएर यो गाडी प्रहरीलाई दिएको भने होइन ।’ नगरको शान्तिसुरक्षा कायम गर्न सहज होस् भनेर आफूले प्रयोग गर्दै आएको सरकारी गाडी उपप्रमुखलाई दिने शर्तमा कार्यपालिका बैठकबाट निर्णय गराएर प्रहरीलाई गाडी सहयोग गरेको पोखरेलले बताउनुभयो ।
नगरबाट गाडीको चाबी बुझ्दै इप्रका सुरुङ्गाका प्रहरी नायव निरीक्षक सुभाष देबकोटाले दुइटा मोटरसाइकलको भरमा रातविरात शान्तिसुरक्षामा खटिनुपर्दा भोगेको सास्ती अव निकै कम हुने आशा व्यक्त गर्नुभयो । इलाका प्रहरी कार्यालयले यसअघि प्रयोग गरेको गाडी पनि नगरपालिकाले नै उपलव्ध गराएको थियो ।
