काठमाडौँ,९ पुस । श्रम, रोजगार तथा सामाजिक सुरक्षा मन्त्री राजेन्द्रसिंह भण्डारीले श्रम स्वीकृतिका लागि श्रमिकहरूले काठमाडौँ धाउनुपर्ने अवस्थाको अन्त्य गरिने बताउनु भयो ।
बुधबार सामाजिक सुरक्षा कोषको कार्यक्रममा बोल्दै मन्त्री भण्डारीले श्रम स्वीकृतिको सेवालाई स्थानीय वडा तहसम्मै पु¥याउने योजना रहेको बताउनु भयो । उहाँले श्रमिकले विभिन्न झन्झटमा पर्नुपर्ने अवस्थाको अन्त्य गरिने प्रतिबद्धता समेत बताँउनु भयो ।
मन्त्री भण्डारीले श्रम स्वीकृतिका लागि अहिले भइरहेका प्रशासनिक झन्झटहरूप्रति प्रश्न पनि उठाउनु भयो । उहाँले भन्नु भयो– ‘श्रम स्वीकृति, व्यक्तिगत विवरण र वैदेशिक रोजगारीसँग सम्बन्धित सबै प्रक्रियाहरूलाई किन वडा र पालिकामै नदिने ? किन यस्तो ट्रयापिङ र झमेलाहरू सिर्जना गरिन्छ ? हामी यी सबै कुरालाई सिधै वडा तहमा पु¥याएर श्रमिकलाई सहज बनाउन आवश्यक छ।’
मन्त्री भण्डारीले वैदेशिक रोजगारीमा जाने श्रमिकलाई राज्यले बिदाइ गर्दा नै सुरक्षाको प्रत्याभूति दिनुपर्ने बताउनु भयो । ‘कल्याणकारी राज्यले त नागरिक विदेश जाँदै गर्दा ‘लौ तिम्रो पासपोर्ट, तिम्रो श्रम स्वीकृति र सामाजिक सुरक्षाको ग्यारेन्टी भयो, अब ढुक्कसँग जाऊ’ भन्नुपर्ने हो,’ उहाँले भन्नु भयो ।
उहाँले श्रम स्वीकृतिलाई एउटा झन्झटिलो प्रक्रियाको रूपमा भन्दा पनि श्रमिकको अधिकार र सुरक्षाको दस्ताबेजको रूपमा विकास गर्नुपर्नेमा जोड दिनु भएको छ ।
अवैध बाटोबाट वैदेशिक रोजगारीमा जाने क्रम बढ्नुमा श्रम स्वीकृतिको झन्झटिलो प्रक्रिया पनि एउटा कारण रहेको मन्त्री भण्डारीको ठम्याई रहेको छ। मन्त्री भण्डारीले श्रम मन्त्रालयभित्र रहेका नीतिगत र प्रक्रियागत अड्चनहरूलाई हटाउन आफू लागिपरेको बताउनु भयो ।
