पथरी, ९ पुस / मोरङ बेलबारीकी साहित्यकार तीला लेकालीको गजलसंग्रह ‘आगोको रङ’ काठमाडौंमा लोकार्पण गरिएको छ ।
प्रगतिशील लेखक संघले काठमाडौंस्थित पद्यकन्या क्याम्पसमा आयोजना गरेको कार्यक्रममा संघका सल्लाहकार तथा कार्यक्रमका प्रमुख अतिथि रघुजी पन्तका साथै जगत उपाध्याय प्रेक्षित लगायतले ‘आगोका रङ’ गजलसंग्रहको लोकार्पण गर्नुभएको थियो । लोकार्पणपछि प्रमुख अतिथि पन्तले लेखकहरूले राष्ट्रियता, जनतन्त्र र जनजीविकाको पक्षमा तथा विकृति, विसंगति र अव्यवस्थाको विपक्षमा कलम चलाउन आग्रह गर्नुभयो ।
कार्यक्रममा, कर्ण दयाल सोराडीको मुक्तकसंग्रह ‘उथलपुथल’ र संघका कोशी अध्यक्ष बिन्दु दाहाल मूकदर्शकको ‘आमा’ स्मृति काव्य पनि लोकार्पण गरिएको छ । साहित्यकार हरि सिलुवालले लोकार्पित कृति आगोको रङको समीक्षात्मक टिप्पणी गर्नुभयो । संघकी कोशी प्रदेशकी पूर्व अध्यक्ष एवम् केन्द्रीय सचिवालय सदस्य लेकालीको लेखनको प्रभावकारिताका बारेमा चर्चा गर्नुृभयो ।
कार्यक्रममा संघको स्मारिका ‘प्रलेस–३१’ अंक पनि लोकार्पण गरिएको छ ।
प्रलेस केन्द्रीय अध्यक्ष देवी क्षेत्री दुलालको अध्यक्षताको कार्यक्रममा प्रलेस श्यामप्रसाद स्मृति पुरस्कार–२०८२ ईश्वरचन्द्र ज्ञवाली, प्रलेस प्रतिभा पुरस्कार–२०८२ अनिल शर्मा विरही, प्रलेस बालसाहित्य पुरस्कार–२०८२ बालसाहित्यकार सुशीला प्रधानाङ्ग र प्रलेस युवा पुरस्कार –२०८२ रूपक अलङ्कारलाई प्रदान गरिएको छ ।
प्राडा जिवेन्द्रदेव गिरी, मातृका पोखरेल, प्राडा देवी नेपाल, शान्ता मानवी, नर्वेदेश्वरी सत्याल, डा. बमबहादुर थापा जिताली, मिरा काफ्ले, रमेश निरौला, उमा सिजापति, ललिता दोषीलगायतको उपस्थिति रहेको थियो ।
