काठमाडौं,१८ पुस । नेकपा (एमाले) का अध्यक्ष केपी शर्मा ओलीले सन् २०२६ लोकतन्त्र र संविधानको पुनरोत्थानको वर्ष बन्नुपर्ने बताँउनु भएको छ । सन् २०२५ मा भत्किएको लोकतन्त्र र खण्डित गरिएको र मिचिएको संविधानलाई सन् २०२६ मा मजबुत बनाई उठाउनुपर्ने उहाँले बताँउनु भएको छ ।
नयाँ वर्ष सन् २०२६ का अवसरमा बिहीबार साँझ प्रवासी नेपाली मञ्च, अन्तर्राष्ट्रिय समितिलाई भर्चुअल्ली सम्बोधन गर्दै ओलीले सन् २०२५ नेपाल र नेपालीका लागि दुःखद वर्ष भएको बताँउनु भएो छ ।
नेपालमा लोकतन्त्र विस्थापनको ठूलो सिलसिला गम्भीर ढङ्गले सुरू गरिएको उहाँले बताँउनु भयो । नेपाली जनताको सचेतनताका कारण प्रतिगमनकारीहरूले त्यो प्रयासलाई चाहेको ठाउँमा पु¥याउन नसकेको उहाँले बताँउनु भयो ।
उहाँले भन्नु भयो,‘जननिर्वाचित सरकार ढल्नु भनेको देशमा लोकतन्त्र र संविधान ढल्नु हो, जनताको सार्वभौमसत्ता थिचिनु, मिचिनु र ढालिनु हो ।’
वर्तमान सरकार असंवैधानिक भएको र संसद अनधिकृत व्यक्तिको सिफारिसमा विघटन गरिएको भन्दै यो प्रधानमन्त्री परिवर्तनको कुरा मात्रै नभई लोकतान्त्रिक प्रणाली र प्रक्रिया माथिको प्रहार भएको उहाँले बताउनु भयो । प्रतिनिधि सभा सदस्य निर्वाचन मिति तोकिए पनि अहिलेसम्म निर्वाचनको वातावरण नबनेको उहाँले बताँउनु भयो ।
सरकारले वातावरण बनाउने दिशामा काम नगरिरहेको बताउँदै ओलीले निर्वाचनका नाममा लोकतान्त्रिक प्रक्रिया दुरूपयोग गरेर त्यसलाई मास्ने प्रयास हुनसक्ने खतरा औल्याँउनु भयो ।
‘नेताहरूविरूद्ध झुठा मुद्दा लगाउने, अशान्त वातावरण सिर्जना गर्ने, लुटिएका हतियार फिर्ता नहुने, जेलब्रेक गर्नेलाई अगुवा बनाएर राजनीतिलाई लान खोजियो,’उहाँले भन्नु भयो, ‘निर्वाचनमा बुथ कब्जा गर्न खोजियो र निर्भयपूर्वक मतदान भएन भने निर्वाचन लोकतन्त्र कमजोर बनाउने ‘ड्रामा’ मात्र हुने छ ।’
निर्वाचनमा जन अभिमत स्वेच्छाले प्रकट हुन पाउनुपर्नेमा जोड दिँदै ओलीले शान्तिपूर्ण वातावरणमा स्वच्छ निर्वाचन जहिले हुन्छ, एमाले निर्वाचनमा सहभागी भएर जित्ने बताँउनु भयो ।
विगतमा संसद् विघटनका मुद्दामा सर्वोच्चले दुई महिनामा फैसला दिने गरेको स्मरण गर्दै उनले यो कसैको निजी नभई राष्ट्रको विषय भएकाले समयमै फैसला आउनु पर्ने बताँउनु भयो ।
गत भदौ २३ र २४ गते जेन–जीका नाममा भएका घटना स्मरण गर्दै अध्यक्ष ओलीले सन् २०२५ मा नेपालमा मानवजातिकै विरूद्ध नृशंस र दानवीय व्यवहारका रुपमा चित्रित गर्नु भयो ।
नेपालीपन, नेपाली मनसँग कहीँ पनि नमिल्ने यो घटना यो नेपालका लागि सबभन्दा धेरै असहज रहेको उहाँले बताँउनु भएको छ ।
