भद्रपुर| १८ पुस | झापाको भद्रपुर एयरपोर्टमा आज राति बुद्ध एयरको जहाज दुर्घटनाग्रस्त भएको छ।
आज करिब ९ बजेर १० मिनेटको समयमा काठमाडौँबाट भद्रपुर चन्द्रगढीका लागि उडेको बुद्ध एयरको ATR–७२ जहाज अवतरणका क्रममा रन–वे पार गर्दै पूर्वतर्फ करिब ३०० मिटर अगाडि भासिएर क्षतिग्रस्त भएको हो।
उक्त जहाजमा ५१ जना यात्रु र ४ जना चालक दलका सदस्य गरी कुल ५५ जना सवार थिए। प्रारम्भिक जानकारी अनुसार सबै यात्रु र चालक दलका सदस्यलाई जहाजबाट सुरक्षित रूपमा बाहिर निकालिएको छ।
हालसम्म मानवीय क्षतिको विषयमा यकिन विवरण आउन बाँकी रहेको र त्यस सम्बन्धमा बुझ्ने काम भइरहेको प्रहरीले जनाएको छ।
घटनाको जानकारी पाउनासाथ जिल्ला प्रहरी कार्यालय झापाबाट प्रमुख राजन लिम्बुको नेतृत्वमा ७० जनाको टोली घटनास्थलमा खटिएको छ। सुरक्षाकर्मी, विमानस्थल कर्मचारी र उद्धार टोलीले घटनास्थललाई नियन्त्रणमा लिँदै थप अनुसन्धान अघि बढाएका छन्।
उक्त जहाज आज साँझ ८ बजेर २३ मिनेटमा काठमाडौँबाट चन्द्रगढीका लागि उडेको थियो। दुर्घटनाको कारणबारे विस्तृत अनुसन्धान भइरहेको प्रहरीले जनाएको छ।
