झापा, २७ पुस । मेचीनगर नगरपालिका वडा नम्बर ४ बाहुन्डागी बजारमा चौथो अन्तर्राष्ट्रिय तरुल उत्सव आगामी पौष ३० गते र माघ १ गते भव्य रूपमा आयोजना हुने भएको छ।
कृषि, संरक्षण, संस्कृति र पर्यटनलाई एउटै सूत्रमा बाँध्दै सहअस्तित्व, संस्कृति र समृद्धिको अन्तरसीमा सन्देश बोकेको यो उत्सवमा नेपालका सातै प्रदेशसहित भारत र भुटानको सहभागिता रहने आयोजक समितिले जनाएको छ। उत्सवका क्रममा विभिन्न देशका कृषि विज्ञ, पर्यटनकर्मी, संरक्षणवादी र सांस्कृतिक टोलीहरूको उपस्थिति रहनेछ। उत्सवको उद्घाटन कोशी प्रदेशका मुख्यमन्त्री हिक्मत कार्कीको प्रमुख आतिथ्यतामा हुनेछ। दोस्रो दिन मेचीनगर नगरपालिकाका प्रमुख गोपालचन्द्र बुढाथोकी प्रमुख अतिथि रहनेछन् भने बेलुकाको सांस्कृतिक कार्यक्रममा कोशी प्रदेश सभा सदस्य गोपाल तामाङ प्रमुख अतिथिका रूपमा सहभागी हुनुहुनेछ। सांस्कृतिक कार्यक्रममा दार्जिलिङकी चर्चित लोकगायिका डेजी बराइली, कुचबिहारका लोकगायक राजिवजीको टोली, लोकगायक कमलीकान्त भेटवाल, गीत–संगीतकार डा. टिका भण्डारी तथा अभिनेता एवं उद्घोषक सिद्धार्थ सिंहलगायतको विशेष प्रस्तुति रहनेछ।
उत्सव अवधिभर लोकनृत्य प्रतियोगिता, मानव–हात्ती द्वन्द्व न्यूनीकरणसम्बन्धी बहस, अन्तरसीमा पर्यटन र जैविक कृषि संवाद, जातीय संस्कृति, हस्तकला तथा रैथाने उत्पादनका स्टलहरू सञ्चालन हुनेछन्।
यसै अवसरमा सिक्किमको ‘डिस्कभर टेमी’ संस्था र आयोजक समितिबीच तीन वर्षे पर्यटन सहकार्यसम्बन्धी समझदारी पत्रमा हस्ताक्षर हुने भएको छ। साथै खुसीलाल चोकदेखि मेची खोलासम्मको सडकमा टाइल्स बिछ्याउने घोषणा कार्यक्रम पनि यही उत्सवमा गरिने यसको मुल आयोजक समितिका अध्यक्ष तथा मेचिनगर नगरपालिका वार्ड नं ४ का वार्ड अध्यक्ष समेत रहनुभएका अर्जुन कार्कीले जानकारी दिनुभयो ।
