दमक,२ माघ । दमकबाट प्रहरीले एक थान अवैध हातहतियारको पार्टपुर्जा बरामद गरेको छ।
आज झापा जिल्ला दमक नगरपालिका–१ सुकुम्बासी बस्तीमा बस्दै आएका डेक बहादुर थापाको घरमा हातहतियार लुकाई राखिएको छ भन्ने गोप्य सूचनाको आधारमा प्रहरीले खानतलासी गरेको हो।
इलाका प्रहरी कार्यालय दमकबाट प्र.ना.उ. किशोर लम्सालको कमाण्डमा खटिएको प्रहरी टोलीले डेक बहादुर थापा बस्दै आएको जस्ताको बेराले बनेको, जस्ताको छानो भएको टहराभित्र खोजतलासी गर्ने क्रममा टहराको भुइँमा बालुवाले पुरेर राखिएको अवस्थामा सर्टगनको बटको भाग फेला पारेको प्रहरीले जनाएको छ। बरामद गरिएको उक्त बटको भागमा १३२०४४७ नम्बर उल्लेख रहेको छ।
प्रहरीका अनुसार उक्त हातहतियारको पार्टपुर्जा यसअघि मिति २०८२ साल असोज २४ गते जेनजी आन्दोलनका क्रममा इलाका प्रहरी कार्यालय दमकबाट लुटी लगिएको अभिलेखमा देखिएको छ।
बरामद गरिएको हातहतियारको पार्टपुर्जा कानून बमोजिम सुरक्षित रुपमा इलाका प्रहरी कार्यालय दमकमा राखिएको छ भने घटनासँग सम्बन्धित व्यक्ति डेक बहादुर थापाको खोजतलास कार्य जारी रहेको प्रहरीले जनाएको छ।
